戴志偉話齋，「一日未完場，一日都唔好放棄！」法甲今晨上演咗一場超經典賽事，兩支前度聯賽冠軍里昂同蒙彼利埃，合演反轉再反轉、5:4嘅超級入球騷！
里昂仲有機會殺入來屆歐協聯，而蒙彼利埃就冇嘢好爭，踢落里昂決心明顯較強。31分鐘，前阿仙奴射手拿卡錫迪建功，為里昂先開紀錄。
不過里昂領先後，防線猶如缺堤一樣，蒙彼利埃嘅超新星、20歲前鋒艾爾華喺上半場尾段連入兩球，蒙彼利埃戲劇性領先上半場。
換邊後繼續神奇，艾爾華又再整兩粒，率先食出大四喜，蒙彼利埃喺55分鐘，領先到4:1。以為場波擺入雪櫃，點知真正戲肉依家先出現！
里昂落後下並冇放棄，拿卡錫迪喺59分鐘追番1粒，2:4！70分鐘，前利物浦中堅洛夫雲頂成3:4！82分鐘，拿卡錫迪完成帽子戲法，追成4:4！氣勢如虹嘅里昂，最後更狂攻對手，補時階段獲得12碼，拿卡錫迪喺第100分鐘操刀射入，里昂反勝5:4完場。
精華傳送門：https://youtu.be/G2zRPn-X_Bo
法甲近49年來，首次出現兩位球員分別食出大四喜，拿卡錫迪再入4球之後，喺法甲射手榜已經追平麥巴比，以24球並列第1位。
講開麥巴比，佢隊巴黎聖日耳門喺缺少美斯、尼馬下，由麥總獨挑大樑，作客以3:1擊敗特魯瓦，目前領先次席朗斯6分，聯賽只餘4輪，封王只係時間問題。
