法甲名牌巴黎聖日耳門，周一凌晨於兩大球王合作刷新紀錄下，以2比1作客擊敗下游球隊歐塞爾。PSG贏波後累積84分，次席朗斯就有78分。基於法甲只剩2輪賽事，PSG只要下輪作客斯特拉斯堡打和，即可提早封王。
歐塞爾實力一般，巴黎聖日耳門一開波就積極推進，第6分鐘已經開紀錄，前鋒麥巴比於禁區左拐右扭後，搵到空位即快腳抽射，歐塞爾門將拉度只呆企目送皮球入網。
2分鐘之後，麥巴比再有進帳。美斯於右路橫傳，隊友伊傑迪基刻意漏過，麥巴比於禁區頂撞射入網成2比0。
歐塞爾短時間內連番失守，自然要急起直追。無奈幾次攻勢都被PSG門將當拿隆馬化解。直到51分鐘，歐塞爾球員辛拿約高，趁對手稍放鬆追至1比2。
去到補時第3分鐘，麥巴比幾乎取得今場第3個入球，美斯於中圈附近直傳，劏穿歐塞爾防線，麥巴比衝前成單刀之勢再射遠柱而入，點知被判越位在先。補時第6分鐘仲有入波機會出現，PSG後備域天拿右路傳中，麥巴比衝前撞射竟然唔中目標。
雖然麥總未能中三元，但就為球隊連續6場取得入波，亦都奠定捧盃基礎。另一位球王美斯，今場亦有一個助攻，今季各項賽事錄得20次助攻、20個入球，成為今季歐洲5大聯賽第一人。不過美斯今場依然愁眉不展，幾可肯定完季之後離開，相信佢嘅去向都好受球迷關注。
