麥巴比、尼馬放低矛盾，踢無私足球，加上美斯支援，MNM發揮強大攻力，聖日耳門作客7:1大炒里爾，法甲開季3連勝。
上場雖然贏蒙彼利埃，但爆出三巨頭不和。特別麥巴比，好似嬲咗全世界咁，同尼馬搶射12碼，又唔尊重美斯，賽後更衣室更鬧大交。
今仗賽前，麥巴比同尼馬擊掌，互相鼓勵，聖日耳門亦閃電開紀錄。中場開波只有8秒，係8秒呀！3腳短傳後，美斯放一個直線，麥巴比無人看管，輕鬆挑射入網，就係咁簡單，聖日耳門開紀錄。呢球亦係法甲自有統計以來，史上最快入球。
三巨頭今場全面配合，曾美妙互傳後由美斯入波，但越位在先；尼馬、麥巴比亦唔獨食，互相製造餐士，可惜3次射門都唔入。
里爾咁早失球，打亂部署，更頂唔住三巨頭，28分鐘再失波。麥巴比交美斯，球王斜傳左路紐奴文迪斯後，再走入禁區接應傳中射入，看似簡單、一氣呵成。
聖日耳門越踢越爽，尼馬先交阿舒拉夫入波，之後接應美斯傳送，自己整番球，上半場領先4:0。
麥巴比、尼馬下半場配合更精彩，52分鐘，麥巴比靚漏，畀位置更好嘅尼馬建功；66分鐘，麥巴比後場發動攻勢，傳交尼馬後爆衝，尼馬投桃報李，較番個靚炮畀拍檔入波；87分麥巴比又接應尼馬直傳，完成帽子戲法，射成7:1完場。MNM今場發揮的確精彩，三巨頭如果Keep住咁融洽，呢隊PSG都幾得人驚！
