今日凌晨，轉會大神Fabrizio Romano突然投放震撼彈，話麥巴比同巴黎聖日耳門就續約一事而搞到關係破裂，今夏9成走人！
其實尋日已經一直蘊釀緊呢個消息，據《隊報》報導指，麥巴比周一出信通知PSG，佢並無打算行使合約中續約一年嘅選項，換句話講，即係麥總份約喺2024年就會結束，佢出年就會以自由身離開。
一直事事遷就麥巴比嘅PSG會方，據Romano所講，今次堅燥咗，並強硬回應，一係就續約、一係就今夏賣走，絕對唔會畀麥巴比以自由身離開。
據西班牙媒體ABCDeportes所講，皇馬同麥總其實夾好咗，喺出年一月就會簽協議，年薪2000萬歐元、簽字費3000萬歐元，簽約6年，比起PSG 3000萬歐元年薪雖然較少，不過麥總為咗攀上事業高峰，亦絕對唔介意。
不過，麥總同PSG今日突然鬧翻，完全打亂晒皇馬嘅部署。皇馬主席佩雷斯早前都講到明，會方一定會買麥巴比，但唔係今年。
事實上，皇馬雖然有錢，但剛啱先用咗1億歐元買祖迪比寧咸，賓施馬突然離隊之下，又要搵過至少一位中鋒，傳聞中嘅夏維斯同哈利卡尼，身價都絕對唔會平；加上皇馬啱啱先畀咗件7號雲尼素斯，又點可能買麥巴比返嚟，將雲尼素斯踢落後備？
唯一可行嘅，就係將麥巴比擺喺中鋒位置，但麥總一早都講過，翼鋒先係佢踢得最開心嘅位置，最好仲要有中鋒幫佢開路，目前完全冇晒中鋒嘅皇馬，仲會唔會出手？
當然，以麥總嘅天價年薪同轉會費，選擇亦根本不多，當今歐洲球壇除咗皇馬，預計就只有拜仁、車路士、曼市雙雄同阿仙奴負擔得到。
拜仁財政政策極度健康，根本唔會為任何一位球員打破規矩；車路士被FFP搞到頭都大埋，依家都仲諗緊點拆；曼城已經有夏蘭特，再買麥總嘅可能性不大；反而曼聯喺坦哈格手底下踏入第二年，嚟緊球會賣得成盤的話，財力更加雄厚，收購麥總絕不是夢，而新雙驕分別喺曼市雙雄，亦極具噱頭。至於阿仙奴係冷啲，但其實高安基家族富可敵國，而且佢哋名下嘅金塊歷史性成為NBA總冠軍，會唔會食住上？麥總最終花落誰家，真係要等多陣先知喇。
