法甲豪門巴黎聖日耳門，星期日喺法甲以4:3戲劇性反勝里爾，美斯射入靚罰球固然係成為焦點，不過都有唔少網民，更加關心尼馬嘅傷勢，以及「纏擾」咗佢近10年嘅「細妹生日魔咒」。
巴黎聖日耳門鬥里爾一戰，真係夠晒戲劇性，領先2球下畀人連入3球，倒輸2:3，完場前基利安麥巴比靚波扳平，加上美斯罰球絕殺，最終險勝4:3。呢場波尼馬都有士哥，但就喺下半場初段扭傷右腳足踝，要由擔架抬出場，當其時尼馬爆喊，令唔少球迷擔心佢嘅傷勢。
事實上，尼馬足踝舊患嚴重，加上PSG喺歐聯16強首回合0比1不敵拜仁，球迷驚佢有排抖、踢唔到次回合都好正常，好彩，PSG尋日出聲明，話經磁力共振檢查後，尼馬足踝冇骨折，總算係不幸中之大幸。
不過，有心水清嘅網民提出：「尼馬細妹Rafaella喺3月11號生日，尼馬又係時候受傷喇！」睇翻歷史，3月11號前後又真係「剋住」尼馬，由2014年至今，除咗舊年歐聯對皇馬、2020年歐聯對多蒙特外，其餘7年，尼馬喺呢段時間全部因傷缺陣，又或者係咁啱停賽。
尼馬同Rafaella感情一向極之要好，尼馬喺2014年設立慈善基金，幫助巴西嘅小朋友，Rafaella除咗模特兒工作外，閒時就係主力幫尼馬處理基金工作，兩兄妹亦經常結伴旅行同聚會。
而PSG將會喺3月9日作客德國，同拜仁合演歐聯16強次回合賽事，PSG首回合落後0:1；到咗3月12日，PSG就會回師聯賽，作客比斯特，唔知呢兩場波，會唔會見到尼馬嘅身影呢？
