被全球大部份球迷恥笑、盛傳將會離隊嘅PSG球星尼馬，竟然提早銷假，返PSG報到兼開操，以為佢想扮生性博留隊？錯喇！佢之後就如常去巴黎時裝展，仲高調打卡po靚相，foot01.com認為尼馬咁做，係要話畀全世界聽，佢如常工作、夜蒲，唔會因為其他因素而改變自己。
早前PSG老細艾卡利化公開強調唔要花瓶，一般估計尼馬嘅PSG生涯已接近尾聲，但畢竟炒佢實在太貴，又冇乜球會負擔到佢嘅人工，加上新帥加迪亞上任後，亦不止一次公開讚尼馬，令呢位巴西王牌留隊機會大增。
尼馬因為早前曾出戰國際賽，原定下星期一先歸隊，但佢同美斯一樣，提早銷假，喺早兩日已返PSG報到，隨即開操。
正當大家以為尼馬係為咗討好新帥所以咁生性，但去到前晚，尼馬同以往一樣，高調出席巴黎時裝展兼嗒番幾杯，雖然冇飲到爛醉，但都唔係極度清醒嗰隻。
提早開操，但同時如常夜蒲，法甲網站foot01.com有評論員認為，尼馬咁做就係話畀世人聽佢嘅態度，用中文簡單啲講，即係笑罵由人。
麥帝想踢走尼馬，而美斯想尼馬留隊，一向係公開秘密，《世界體育報》報導，麥巴比同美斯更為尼馬留隊問題而對話，報導更用conflicto（西班牙語、衝突）嚟形容美斯同麥巴比，至於有幾火爆，暫時就冇更深入消息喇。
點都好，尼馬要搵下家確有難度，不過筆者觀乎車路士新班主保利近日嘅消息，佢似乎好想簽個巨星返嚟響朵，一係C朗、一係尼馬，最終邊個跑出定還是筆者估錯，大家拭目以待喇。
