美斯英雄回歸，即平C朗紀錄！成為世界盃冠軍後，美斯終於再為巴黎聖日耳門上陣，周四凌晨法甲，帶領球隊以2:0擊敗昂熱。
雖然休息咗一段時間，球王仍保持佳態，依然行雲流水，瀟灑自若。除有份策動艾基迪基上半場入球，到72分鐘，美斯交波後殺入禁區接應，再第一時間熨射破網，更加賞心悅目。
美斯於歐洲5大聯賽，已射入696球，追平C朗保持嘅最高紀錄。美斯用832場達標，C朗919場。
美斯踢埋今季約滿，暫時傳出佢口頭承諾留效聖日耳門，但最新消息係沙特阿拉伯球會希拉爾，有意邀請球王加盟，令絕代雙驕換個戰場，有再次較量嘅機會。
之前C朗加盟艾納斯，合約總值2億歐元，成為全球最高薪球員，希拉爾有意開出3.5億歐元（約港幣29億）年薪，希望能夠打動美斯。
計沙特聯賽實力，希拉爾4奪亞冠盃冠軍，比C朗嘅艾納斯更性一籌。眼見對手收購C朗後引爆強大效應，故希拉爾有意製造更轟動嘅轉會。
美斯本身已經係沙特旅遊大使，早有淵源，而且攞埋世界盃，係時候為掛靴後嘅生活策劃，加上目前攞聖日耳門1.35億歐元年薪，同3.5億有大段距離，若然希拉爾肯畀，對美斯的確有好大吸引力。
