打機冇出色？Out晒喇！依家電競業興起，即使係玩Football Manager，一樣有出頭天！目前法甲最有話題性嘅球隊，除咗PSG，仲有隊蘭斯。
蘭斯雖然並唔係咩豪門，目前亦只係僅排第10，但佢哋近期已保持17場聯賽不敗，表現相當硬淨，由阿仙奴借番嚟嘅前鋒巴洛根，更已經入咗15球，喺射手榜僅次17球嘅麥巴比，與里爾前鋒莊拿芬大衛並列次席。
到底邊個咁把炮，可以令季初嘅降班膽踢到咁硬淨？佢叫威廉史迪爾（William Still），比利時人，依家先30歲，係5大聯賽中最年輕嘅主帥。威廉史迪爾從來未踢過職業比賽，球員生涯最高峰，亦只係喺比利時第4級別聯賽打滾，但佢就靠一隻足球經理遊戲（Football Manager），展現出過人嘅足球領軍天賦。
大家都知FM嘅數據庫有幾堅，威廉史迪爾就係喺打機嘅過程中，發掘到戰術運用、球員買賣同培訓嘅樂趣，出現咗要做教練嘅念頭。史迪爾行動力超強，佢隨即去咗英國邁爾斯高夫學院（Myerscough College）進修，咁啱呢間學院同英冠球隊普雷斯頓有合作關係，史迪爾就喺2011年加盟普雷斯頓，擔任U-14助理教練，當時佢只得19歲。
2014年，史迪爾回流比利時，成為聖圖爾登影像分析師，並逐漸參與一隊訓練，3年後轉投當年乙組嘅球會利亞斯，出任影片分析師兼主教練Frederik Vanderbiest嘅副手，其後Vanderbiest被炒，史迪爾擔任臨時主帥，並領軍踢出7連勝，不過史迪爾因為未有A級教練牌，所以當球會請到新帥後，史迪爾就做番助理教練，及後再轉投甲組升班馬比斯特，2021年再次臨危受命做暫代主帥，成為比甲史上最年輕領隊。
史迪爾堅係領軍奇才，今季開始喺蘭斯擔任助理教練，由於蘭斯前10輪聯賽僅得8分，護級形勢不容樂觀，於是會方就炒咗主帥奧斯卡加西亞，並喺10月13號正式改由史迪爾接手救火，由當時起計，蘭斯踢咗15場聯賽，戰績係7勝8和，期間只係失咗7球波，當中包括作客逼和PSG及里爾，勁誇張！
史迪爾主打4231陣式，foottheball.com更分析指，蘭斯主要依靠邊路一對閘同一對翼做進攻，中場就只係負責掃蕩，到失去控球權嗰陣，就會轉為442陣式，由前面一對鋒將開始做逼搶，咁複雜多變嘅戰術體系，蘭斯球員都可以執行得咁順暢，史迪爾的確有佢過人之處。
之不過，由於史迪爾仲未有職業教練牌，所以佢依家每執教一場法甲比賽，蘭斯就要罰款25000歐元（約20萬港元），但會方認為物有所值：「只要史迪爾一路有貨交，我哋就會一直投資。」以蘭斯目前嘅走勢，的確有望衝擊歐洲賽資格，加上幾位球員包括伊東純也、阿歷斯菲臘斯喺史迪爾麾下大升呢，被歐洲豪門吼到實，到時賣到錢的話，條數都喺番度啦！
