'

【法甲】法國總統又出手!馬克龍勸掂施丹教PSG!見埋老細後即官宣

巴黎聖日耳門如果出年拎歐聯冠軍的話,最大「功臣」,一定係法國總統馬克龍!繼氹掂麥巴比留隊後,馬克龍又成功游說施丹回心轉意、執教PSG,法國大量媒體報導,施丹去卡塔爾見完老細之後,PSG就會官宣。

PSG大把錢,雖然佢哋喺法甲獨大,但無論點買人,始終未能染指歐聯冠軍,今夏更盛傳王牌麥巴比會離隊、加盟皇馬,不過去到重要關頭,法國總統麥克龍幫口,加上一張極級肥約,終於挽留到麥巴比。

氹掂球星,當然要處理埋最重要一環:主教練!普捷天奴搞唔掂班大帝係不爭事實,幾有料都冇用,而且佢始終未算係歐洲冠軍級主帥,想拎歐聯冠軍,都係搵番個有經驗嘅最好。

早喺上個月,施丹曾經拒絕PSG邀請,會方轉移目標撬摩連奴,不過摩佬心繫羅馬,又請PSG食檸檬;有傳日前PSG又接觸過尼斯主帥加迪亞,但未知係又再食檸檬、定有人嫌佢唔夠卡士,消息指會方已中斷聘請加迪亞嘅工作,兜咗個大圈,原來都係等施丹!

施丹曾帶領皇馬封王西甲,3次捧歐聯冠軍,大牌如C朗都絕對信服,而丹爺喺法國同球壇嘅威望,更加唔使多介紹,佢肯定係教PSG嘅最理想人選。

法國總統馬克龍見勢色唔對,又再出口術幫PSG:「我好崇拜施丹,佢做球員同教練都好成功,佢之前帶領皇馬3奪歐聯,呢個係我哋法甲球會嘅目標,我希望佢返嚟,幫手提升法甲嘅地位。」

講到咁白,施丹有晒飛士,法國傳媒爆料,指施丹將會飛赴卡塔爾,同PSG班主、亦即卡塔爾體育投資基金代表會面,據稱雙方已經傾掂大方向,只要搞埋啲合約細節就可以官宣,有施丹揸旗,麥帝可以放心踢波,唔使兼顧教練工作啦!