「MNM」鋒線將徹底解散！繼美斯今夏離隊，麥巴比拒絕續約之後，巴黎聖日耳門將面臨再失去另一王牌尼馬，這位31歲巴西巨星，已提出離隊要求，希望今夏完成轉會。
6季以來，5季聯賽上陣次數在20次或以下，坐多過踢，而且表現不似預期，每逢大時大節或妹妹生日碰巧受傷，尼馬無論專業操守抑或表現，均遠遠不符破世界轉會費紀錄2.22億歐元的身價。
PSG球迷近年已對尼馬失去耐性，反馬行動有升級趨勢，比賽期間喝倒彩乃指定動作，今年5月，更有球迷包圍其住所示威，並以粗言穢語辱罵尼馬，要求該巴西球星離隊。
據消息指，由於部份激進球迷的另一攻擊對象美斯經已離隊，麥巴比若離隊不成亦會被雪藏，大膽預測，若然聖日耳門新季成績欠佳，尼馬必定成為眾矢之的，為免惹麻煩，便決定提出離隊。
去年夏天，尼馬便被爆與麥巴比不和，管理層早已非常不滿，已想將尼馬出售，如今難得眼中釘主動求去，相信PSG亦樂於放人。
下間球會？車路士有興趣，但超高薪是一大障礙；尼馬好想重返巴塞隆拿，但巴塞仍陷財困危機，相當難搞；最大機會當然是沙特聯賽，希拉爾之前斟介美斯、麥巴比失敗，始終想搵超級前鋒，與尼馬應該可以一拍即合。
