麥巴比超級大支嘢，對隊友發晒老脾，唔畀面美斯同尼馬，引爆聖日耳門內部糾紛。連朗尼都頂佢唔順，話未見過咁自大嘅球員。
上場法甲對蒙彼利埃，麥總自己射失一個十二碼後，到尼馬準備主射另一球時，佢又上前爭射，搞到氣氛好僵；一次見到隊友傳波畀美斯，冇傳畀自己時，即時收步兼舉晒手表示不滿；又試過嬲爆爆走過美斯身邊，膊頭撞到美斯冇表示，搞到美斯呆咗，睥住問乜料呀！
賽後更衣室依然火藥味濃，唔少隊友都對麥總有意見，要沙治奧拉莫斯做中間人鎮住場面，先至收到科。雖然麥巴比媽媽透露，阿仔同尼馬已就爭射12碼一事冰釋前嫌，但極唔尊重美斯嘅態度，依然令外界側目，朗尼就批評麥巴比目中無人，唔尊重7屆金球獎得主美斯。
「一個23歲球員，竟然唔放美斯喺眼內？我呢世人，未見過咁狂莽自大嘅人。唔該搵人話畀麥巴比知，美斯同佢一樣係23歲時，已經攞咗兩個金球奬。」
有網民為麥巴比辯護：「麥巴比嘅狂妄自大，係畀聖日耳門同卡塔爾財團緃壞。」呢個講法極有道理，麥巴比肯續約，唔去皇家馬德里，除咗加人工之外，更重要係聖日耳門應承佢喺球會有重要決策權，地位完全高過美斯、尼馬。
但接替普捷天奴執教嘅加迪亞，新季進攻模式，反而偏重美斯、尼馬，而且效果仲相當唔錯，特別係尼馬，踢番出個人應有水準，呢種情況，自然令自視極高嘅麥巴比唔舒服。聖日耳門周一凌晨對里爾，好多人都會剝花生，睇吓MNM組合，究竟會和好如初？定繼續再眼睥睥呢？
