又有老牌球會因財困接近玩完……法甲賽會尋晚宣佈，波爾多因未能通過財務審查，下季將要於法丙角逐。波爾多打算上訴，並希望盡快出售陣中最值錢嘅南韓國腳黃義助，整番靚盤數，爭取上訴成功。
波爾多一直受財困問題困擾，上季成績已經唔掂，最終包艇降落法乙，估唔到依家再承受重擊，未能通過法國國家管制處（DNCG）嘅審查，再被罰降班至法丙。
波爾多成立於1881年，曾6奪法甲冠軍、4次足總盃同3次聯賽盃冠軍，對上一次封王係2009年。波爾多曾經培育唔少巨星，亦係球星們嘅落腳地，包括法國球王施丹、泰簡拿、A迪亞拉、哥古夫、杜加里、利沙拉素、韋托特等等都踢過波爾多。
至於近季最值錢嘅球星，係南韓前鋒黃義助。佢喺2019年夏天由大阪飛腳登陸法甲，96次上陣入29球，表現備受讚賞。由於只剩一年約，目前佢身價大約800萬至1000萬歐元，盛傳馬賽、南特、斯特拉斯堡及蒙彼利埃都對佢有興趣，離隊救會幾成定局。
波爾多收到「法丙令」之後，有一個禮拜時間上訴，而球會暫時赤字大約係4000萬歐元左右，波爾多打算透過賣星執番2000萬歐元，加上大股東注資1000萬美元，另同債主傾埋還款協議，希望盡快搞番好盤數，逃過被罰降落法丙嘅厄運。
