修夫基遲遲唔出手，等咩？
英格蘭國家隊正中鋒位置，哈利卡尼當然係必然正選，但時日太快，呢位熱刺神鋒已經就快30歲，環顧目前U21梯隊，最有潛質接班嘅正中鋒，今季喺法甲蘭斯大放異彩嘅巴洛根，肯定係其中之一，可惜呢位阿仙奴借將，已落實效忠美國國家隊，激到一眾英格蘭Fans紮紮跳。
巴洛根喺兩歲嗰陣移居英國，父母都係尼日利亞人，由於巴洛根喺美國出世，所以佢可以揀代表英格蘭、美國及尼日利亞。
目前21歲嘅巴洛根，之前雖然只係阿仙奴青年軍，但有玩開Football Manager嘅朋友，一定對呢位中鋒印象好深，兩季前出道後，上季被外借英冠米杜士堡，今季去到蘭斯一鳴驚人，暫入19球，於法甲射手榜排第5位。
事實上，巴洛根除咗喺球會級賽事有貨交，喺國際賽亦保持高效率，曾代表英格蘭U21共13次，射入7球，但一直冇被英格蘭主帥修夫基徵召，隨住呢位阿仙奴射手今季彈起，佢亦作出選擇，落實「轉會」美國，並已經獲FIFA批准。
目前英格蘭正選中鋒哈利卡尼已經30歲，另外哥林威爾遜更屆31之齡，之後已經要數到27歲嘅艾雲東尼，至於新一輩中鋒，繼有尼基迪亞、巴洛根、林姆戴納等，但三人都可以代表其他國家，依家巴洛根率先選擇不再呆等，其餘兩人，仲有冇咁嘅耐性？
事實上，美國係2026年世界盃主辦國之一，巴洛根趁上位嗰陣揀定先，對出戰世盃當然有極大幫助。
