【沙特超】買唔成美斯 希拉爾轉斟狼隊尼維斯;沙特豪門s不停步 收購list水蛇春咁長

沙特聯賽事先張揚會大搞,矢志成為全球第五大聯賽,豪門希拉爾雖然買唔成美斯,不過轉斟26歲嘅狼隊隊長魯賓尼維斯,而且已接近成事,又一當打球星,即將轉戰沙特聯賽。

26歲嘅魯賓尼維斯,喺上季季尾受訪嗰陣,曾經明言想過檔大球會,由於佢同狼隊只剩1年合約,好多人都已經有晒準備,尼維斯今夏9成會離隊。

早前有消息指巴塞隆拿對佢感興趣,不過,巴塞財力有限,遲遲未出手之餘,更幾可肯定無法滿足狼隊嘅開價,於是就殺出大把錢嘅希拉爾,以其財力,要請呢位名氣唔算巨星級嘅葡萄牙國腳來投,完全係綽綽有餘。

尼維斯喺2017年由波圖轉會當時仍喺英冠打滾嘅狼隊,之後協助球會升班,效力6年期間上陣253場,射入30球。過去幾個夏天,一直傳佢獲阿仙奴、曼聯、利物浦等垂青,但交易始終未能成事,估唔到今次終於似樣,但就由英超豪門變為沙特豪門。

艾拉爾早前喺美斯爭奪戰中,爆冷輸畀美職嘅國際邁阿密,如意算盤打唔響。眼見爭冠對手之一伊蒂哈德已經簽咗賓斯馬,車路士中場簡迪亦已官宣,戰力肯定大幅提升。

另一勁敵艾納斯更加唔使講,上季已經擁有C朗,打響名堂,作為沙特傳統勁旅,希拉爾當然要盡快引入一名歐洲球星,免落後人前。

除咗尼維斯,據大神Romano所講,希拉爾目前亦同車仔傾緊買高列巴尼;另外摩迪、沙拿、馬列斯、薛耶治、阿歷斯山齊士、奧巴美揚、艾度亞文迪、夏薩特、盧卡古、文尼、韋費特沙夏、費明奴、普巴、佐迪艾巴等等,均成為沙特聯賽嘅收購目標,最終幾多人能夠成事,真係要放長雙眼喇。