「沙特阿拉伯將會成為全球第5大聯賽！」早前C朗受訪爆出金句，成為部份球評家同球迷嘅笑柄，不過唔好笑住呀，因為金句分分鐘成真！
法國前鋒、金球獎得主賓施馬，早前同皇馬提早解約後，已幾可肯定加盟今季沙特聯賽冠軍伊蒂哈德，簽約兩年，年薪傳聞高達2億歐元，同C朗睇齊。
當然，沙特聯有錢就是王道，今次瘋狂升呢行動，又點會咁快收手吖？除咗希拉爾利誘美斯，仍然等待答覆之外，其他球隊亦開始「做嘢」，目標係五大聯賽中一啲約滿、或即將約滿嘅名將。
當中最有機會轉戰沙特聯賽嘅，係前阿仙奴王牌阿歷斯山齊士。其實呢位智利球星仲踢得，今季為馬賽射入16球、斬獲兩次助攻，佢同馬賽份合約已經完結，目前係自由身球員。
據《隊報》及多間傳媒引述，對A山有興趣嘅球會係艾法特（Al fateh），上季喺沙特排第6，由於佢哋唔係艾納斯、希拉爾呢類超級無敵大豪門，所以佢哋出手相對較低，據Romano所講，年薪大概係1000萬歐元。
至於狀態沉到爆嘅奧巴美揚亦有捧場客。佢今季喺車仔坐多過踢，成季入得3球，出場時間更不足1000分鐘，奧巴係就係出年先約滿，不過車仔莫講話願意免費放人，就算貼少少錢分分鐘都有得傾。
雖然奧巴好想返巴塞，但老實講，巴塞回收機會確實不大，有傳奧巴已考慮艾沙比（Al Shabab、上季沙特第4）嘅聘約，以佢嘅質素，應付仲未變第6大聯賽嘅沙特聯，應該夠做。
到最新傳出嘅，係車仔超級防中簡迪。Romano報導，簡迪其實好想同車仔續約，可惜佢今季經常受傷，加上車仔有人滿之患，收番筆轉會費放人亦可理解。
目前對簡迪有興趣嘅，分別係C朗嘅艾納斯、以及賓施馬嘅伊蒂哈德，Romano指兩間球會都係開出1億歐元年薪，目前伊蒂哈德有較大機會跑出，簡迪好有可能同賓施馬繼國家隊後，再做隊友。
