悶唔悶呀？2023年，仲係C朗、美斯？尋晚沙特阿拉伯聯賽第3周賽事，葡萄牙巨星C朗大演帽子戲法，加上文尼入兩粒，率領艾納斯5比0大炒艾法特，成功開齋。
自從C朗轉戰沙特聯，美斯空降邁亞密後，以為二人就此慢慢退下主流視線，點知二人喺所屬地頭繼續發光發亮，C朗先令沙特聯成為眾星聚集之地，然後再捧盃阿拉伯冠軍盃；隨後美斯即幾近以一人之力，領邁亞密封王北美盃……
到日前C朗帶領艾納斯殺入亞冠盃分組賽，跟手美斯前日又領軍殺入美職聯賽盃決賽，到尋晚，就輪到C朗勁入3球，率艾納斯開齋……二人隔空較技，輪流霸佔傳媒頭條。
事實上，C朗自從協助艾納斯稱霸阿拉伯冠軍盃後，遇上唔少阻滯，由於佢喺決賽勇戰受傷，缺陣沙特聯開咧戰，艾納斯亦不敵伊蒂法克，第2場復出但冇波入，艾納斯吞兩蛋……
之後亞冠盃遇上發雞盲球證，幾次12碼都冇判，好彩最尾都出到線；不過日前又傳出阿拉伯冠軍盃不獲國際足協承認，導致C朗冇咗個獎盃紀錄。
嚟到沙特聯第三輪，谷埋一肚火嘅C朗，今仗終於大爆發，27分鐘，波索域直傳，C朗後腳妙傳畀文尼建功，艾納斯先開紀錄。38分鐘，C朗接應艾根咸傳中頂入，領先到2:0。
換邊後，艾納斯繼續嚟料，加列比突破越位，再交個靚波畀C朗搞掂，3:0；比賽末段，艾納斯繼續強攻，文尼先喺81分鐘頂入成4:0，C朗補時階段再喺門前掃入，完成帽子戲法，5:0大勝一場。
