貧窮限制想像，尼馬加入沙特超級聯賽，除高到離奇嘅薪酬，另外尼馬更要求5個額外痴_線條件，更加係大開眼界。
沙特球會希拉爾周二官宣，簽入巴西球星尼馬，雙方簽約2年。尼馬轉會費9000萬歐羅，連同附加條款，巴黎聖日耳門最高可以收到1億歐羅。
尼馬加盟希拉爾嘅總薪金係3億美元（約23.4億港元），佢同PSG原本仲有兩年合約，年薪只係2500萬歐元，同依家份新約相比，簡直天與地。
尼馬喺希拉爾會著番標誌性嘅10號球衣，連同新隊友魯賓尼維斯、高列巴尼、米連高域沙域同即將將來投嘅阿歷山大米祖域，火併擁有C朗同文尼嘅艾納斯、仲有賓施馬坐陣嘅伊蒂哈德、神軒壓陣嘅伊蒂法克等等，進行超級星戰。
同C朗一樣，尼馬去到沙特，榮升超級打工皇帝，老細大把貨任你駛，唔提出更多要求就笨喇。呢種上等人嘅生活需求，作為平民係無法想像的，睇睇尼馬向希拉爾提出5大要求，都佩服佢可以講得出口：
- 要有3架豪華跑車，賓利、Aston Martin、林寶堅尼各一，總值51萬鎊。
- 要分配畀自己嘅隨行人員4架旅行車，另外一架連司機嘅七人車，司機要全年24小時ON Call，為尼馬自己、朋友及家人服務。
- 大宅至少要有25間房，畀所有人一齊住；戶外游泳池至少長40米；另要有3間桑拿房、5名全職工人，其中一人嘅工作係廚師助手，協助來自巴西嘅主廚。
- 尼馬和家人出外旅行嗰陣，要有私人飛機接送。
- 尼馬渡假嘅酒店費用、飲飲食食所有消費，要由班主負擔。
