落後、踢少個、入兩球、搏到傷出、成功封王…38歲，35次冠軍！C朗成功創出奇蹟，助艾納斯以2比1反勝希拉爾，收獲沙特生涯首個冠軍。
呢場阿拉伯冠軍盃決賽，由希拉爾決戰艾納斯。阿拉伯冠軍盃係由阿拉伯足協舉辦，今場星光拍得住英超，希拉爾有沙域、馬爾甘、高列巴尼，而艾納斯除咗有C朗，仲有文尼、波索域及迪尼斯。
51分鐘，曾踢過巴塞嘅希拉爾球星馬爾甘傳中，米高頭槌先開紀錄。71分鐘，艾納斯中堅阿安利領紅，落後加上踢少個，以為絕望之際，C朗及時挺身而出！
僅4分鐘之後，C朗就攝位近門扳平，將比賽帶入加時，呢位葡萄牙球王喺加時8分鐘，用頭槌執雞，助艾納斯反勝希拉爾，逆轉封王！
C朗以38歲之齡搏到115分鐘，終於因膝部受傷離場，期間狀甚痛苦，一度落淚。好在，佢班隊友都生性，力保勝果至完場。
C朗順利收獲沙特生涯首個冠軍，而且於阿拉伯冠軍盃連續5場入波、共入6球，擸埋呢項賽事嘅神射手，雙喜臨門！C朗上個冠軍，已經係815日前，為祖雲達斯捧走意大利盃。
