英超又一季，歐洲5大聯賽之中，依然最精彩。但作為利物浦多年擁躉，見愛隊臨尾發力狂追，依然來遲一步，下季只能轉戰歐霸，仲要畀B費勁串，話幫曼聯擁躉做咗一件大事，就係將利記逼出前4，真係冇大志，應該話遺憾冇搶走曼城個冠軍吖嘛！
今季最高評價球隊，梗係白禮頓，同艾美利教維拉一樣咁神奇。仇富左膠，話有錢唔係大晒，今次呢兩隊，仲唔係以弱勝好多強？
以下短評，根據排名：
1）曼城：3連霸，個個讚美夏蘭特，我話光頭佬先最犀利，連基亞利殊都可以搞番生。
2）阿仙奴：佔據榜首最長時間亞軍。悲情？阿仙奴躉慣咗。錯失最好機會，下季……
3）曼聯：即使作為利迷，都真心讚美卡斯米路；仲有迪基亞，神救咗唔少分。冇佢兩個冇前4。
4）紐卡素：未必最好波，但肯定最好鬥志，呢班人腳入前4，賀維有料，今季另一最佳領隊。
5）利物浦：出閘大脱腳，入直路狂發力追第5，好在唔係賭馬。下季執唔掂中後場，依然冇運行。
6）白禮頓：神奇球探系統，大數據發揮強勁效果，二打六可以變一級星，進攻足球真心好睇，哥迪奧拿都大讚。我愛三笘薰，下季有冇得留低？迪沙比9月中接手執教，仲好過樸達，最佳必提名。
7）維拉：年度最佳領隊，艾美利肯定有份，甚至係第一。呢班球員第7名？黐咗根。
8）熱剌：摩連奴之後到干地，名帥之墳墓。哈利卡尼咁環境都入30球，佩服。同老孫一齊撇喇！
9）賓福特：同白禮頓一樣，另一跟上科技洪流，活用大數據球隊，球員演出非常穩定，CP值夠高。
10）富咸：正常發揮、正常排名。韋利安依然咁弗。
11）水晶宮：鶴臣爺爺3月出山救亡，三扒兩撥級成功，排名高過車仔。最服佢咁氹球員：「保持好表現，國腳都有得你做呀！」結果伊斯真係首次入選英格蘭。
12）車路士：由杜曹到樸達到林柏特，車仔今季帶嚟無盡話題，多謝駛咗6億鎊買人嘅老細保利。
13）狼隊：中規中矩成常態，但陷入財困，暑假有機會大散貨⋯⋯
14）韋斯咸：一度護級，但繼上季歐霸入4強，今季歐協聯更晉身決賽，莫天才神操作。
15）般尼茅夫：季初吞過利物浦九蛋，被睇死降班。知恥近乎勇，另類偉大勝利，值得鼓掌。
16）諾定咸森林：季初狂買人，幾乎由頭砌過隊波，好在護到級，否則蝕入骨。
17）愛華頓：成功護級兩大元素，及早炒林伯、多謝白禮頓。
18）李斯特城：降班兩個關鍵，太遲炒羅渣士、第34輪主場對愛華頓，占士麥迪臣12碼宴客、和2:2。
19）列斯聯：畀多一個月時間大Sam，可能有一線生機。都係嗰句：神仙咩！
20）修咸頓：有冇人可以分析，點解好哋哋會搞成咁？
