英超周六凌晨開鑼，展開2023-2024賽季，呢個時間突然領隊走人，你都咪話唔狼孭。
狼隊領隊盧柏迪古突然喺開季前3日，正式宣佈離隊，向球會擁躉投下震撼彈。
盧柏迪古任期只有九個月，但上季狼隊成功護級，盧帥其實係最大功臣。貴為前西班牙及皇馬主帥，盧柏迪古亦係狼隊史上最高薪領隊，本來佢仲有兩年合約，但係佢非常不滿球會今夏轉會操作，令雙方關係決裂。
點解沈威廉讚盧帥係護級最大功臣？睇番舊年11月盧帥接手之時，狼隊其實排喺英超榜尾，到完季時即使以第13名衝線，但狼隊全季都只係得31個入球，比起已降班嘅3支球隊修咸頓、列斯同李城更少，係全英超攻擊力最弱嘅球隊，但就畀佢哋護級成功，盧柏迪古目標為本嘅戰術，相當成功。
可惜，狼隊冇珍惜呢個寶貴嘅英超席位，今季前不但冇重要收購，更將隊長魯賓尼維斯、另外尼敦哥連斯同魯爾占美利斯等核心主力賣走，最終引致盧柏迪古劈炮。
近年好多中資企業，同時出現財政困難，狼隊老細中國復星集團亦唔例外，即使佢哋喺2016收購狼隊嗰陣，曾豪言以捧英超為目標，但嚟到2023，相信連英冠冠軍都未必拎到了。
攻擊力疲弱、主力出走、盧柏迪古劈炮，加上老細莫財，新季狼隊想有運行都幾難。
