火速行動，曼聯同阿仙奴做到嘢！曼聯中場重心艾歴臣重創，離冬季轉會窗關閉前只有24小時，曼聯成功從拜仁借用奧地利中場沙比薩；至於阿仙奴買卡些度一直被抬價，最後關頭轉軚平買佐真奴，轉會費連add on都只係12M，抵玩！
艾歷臣已成曼聯中場核心，佢亦係球隊戰績冒升嘅功臣之一。但上仗足總盃對雷丁，畀前利物浦「經典水貨」卡路爾從後踢傷，經檢查後，要休息至5月初先可以復出。另一中場分波球員雲迪碧克，早前亦因傷宣告今個賽季報銷，令曼聯陷入兵荒危機。
當時距離轉會死線只有24小時，曼聯當機立斷，快速同拜仁達成協議，喺冇買斷條款情況下，借用沙比薩。
沙比薩28歲，2017年奧地利足球先生，計級數當然唔及艾歷臣，但踢法相近，兼且有足夠比賽經驗，可發揮即時替代作用。曼聯今次火速行動，得到里奧費迪南等名宿大讚，及時補充實力，保持下半季爭逐籌碼。
榜首阿仙奴則喺最後一日啟動Plan B，從車路士買入意大利中場佐真奴，呢位31歲大哥雖然跌咗Watt，但曾經係歐洲國家盃、歐聯冠軍成員，英超同大賽經驗兼備，1200萬鎊當然抵到爛，加上之前杜沙特、基維奧先後來投，阿仙奴明顯為爭標搏埋最後籌碼。
第3位紐卡素加入新前鋒，以4500萬鎊從愛華頓收購安東尼哥頓，希望得到聯賽前4名及贏得聯賽盃，佢哋已淘汰修咸頓，決賽好大機會對曼聯。
第5位熱刺早前已有前鋒丹祖馬初登場，呢位荷蘭借將喺足總盃有波入，死線前熱刺又有動作，4200萬鎊收購士砵亭右後衞、西班牙柏度樸路，有玩FM嘅讀者都知，呢位樸路係豪門級妖人嚟。
護級球隊方面，森林搵紐卡素全面幫拖，繼前鋒基斯活特後，再借埋老牌中場舒維爾，之後又喺巴黎聖日耳門，得到哥斯達黎加國腳門將拿華斯，全面升呢。列斯聯則由祖雲達斯，借入美國中場國腳麥堅尼，增加護級實力。
