死亡F組好睇過戲！今晨歐聯，巴黎聖日耳門喺主場大勝AC米蘭3:0，麥巴比領軍射破兒時最喜愛球會，南韓國腳李剛仁則於歐聯開齋，令A米陷入出局危機！
今仗賽前有兩大焦點，兩軍門將緬朗、當拿隆馬互相倒戈，麥巴比被爆會為A米輸波而難過，令呢場波份外矚目。PSG以奧斯文丹比利、高路梅安尼及麥巴比合組三叉戟，A米則由基奧特、里奧及佩利錫攻堅。
PSG今仗佔盡優勢，32分鐘，麥巴比以一己之力左舞右舞射入，打開紀錄，換邊後，丹比利先食鋪詐胡，去到53分鐘，呢位法國國腳再起腳，緬朗擋出，高路梅安尼成功補中，其後李剛仁落場，完場前轟入靚波，取得生涯首個歐聯入球，贈AC米蘭3蛋完場。
李剛仁今夏由西甲馬略卡轉投PSG，轉會費2,200萬歐元，呢位22歲南韓國腳大部份時間擔任後備，不過，佢喺早前南韓國家隊嘅兩場熱身賽共入3球，狀態唔錯，今仗仲喺歐聯入靚波兼開齋，嚟緊應該會有更多落場機會。
至於F組另一場賽事，上輪大炒PSG嘅紐卡素，黑氣似乎又飄番返嚟，主場兩度中楣中柱下，爆冷不敵多蒙特0:1之餘，更有兩大主力伊沙克、積及梅菲受傷，加上東拿利賭波案宣判在即，一般預計要停賽10個月，一時間，紐卡素損失3員大將。
最大鑊係由周日凌晨作客狼隊開始，紐卡素14日內要踢5場波，包括聯賽對阿仙奴、英聯盃鬥曼聯，以及歐聯第4輪作客再戰多蒙特，硬仗連場。
目前F組形勢，PSG 3戰6分升上榜首，多蒙特、紐卡素同得4分，分列第2、3位。A米暫時未贏過兼零入球，2分包尾。
