【歐霸盃B組】奧巴美揚倒掛戴帽 馬賽贏4:3;柏度奠勝 白禮頓贏1:0;兩軍最後一輪互片 激搶首名!

今晨歐霸盃分組賽,英超球隊白禮頓同韋斯咸,同樣以1:0贏波,分別小勝AEK雅典及FK TSC,至少獲32強資格,至於可唔可以直入16強,就要踢埋最後一輪先知,尤其白禮頓下仗對手馬賽,有前阿仙奴隊長奧巴美揚回勇,嚟緊佢回歸英倫,肯定激到爆!

白禮頓賽前收到壞消息,喺上場英超對森林嗰陣傷出嘅安素法迪,有可能要抖3個月,呢位巴塞借將傷患纏身,迪薩比又少一員大將可用之餘,亦令唔少球迷為呢位天才球員感到惋惜。

今場白禮頓喺B組遠征希臘,有日本王牌三笘薰傷癒擔正,不過形勢佔優嘅係主隊AEK雅典,好彩門將雲巴根、中堅鄧克表現平穩,上半場互無紀錄。換邊後戰至52分鐘,祖奧柏度喺禁區內被AEK後衛踢跌,獲得12碼後親自操刀,白禮頓最終亦憑呢個入球小勝對手。

同組另一場賽事,馬賽憑奧巴美揚大演帽子戲法,包括一次精彩倒掛、兩個12碼,主場4:3擊退阿積士,於B組5戰11分,而白禮頓則有10分,最後一輪分組賽,白禮頓會喺主場鬥馬賽,爭奪首名、直接入16強嘅資格。

奧巴美揚今季法甲入得1球,備受球迷質疑,但佢喺今屆歐洲賽入咗7球,總算有番交代,馬賽教練加度素,賽後亦力撐auba:「當一位前鋒陷入入球荒,被球迷批評係好正常嘅事,不過在我嚟講,我從來冇擔心過,因為我唔會懷疑奧巴美揚嘅能力。」

至於A組韋斯咸作客塞爾維亞FK TSC,形勢上亦係較為被動,不過對家多番射門不果,完場前韋斯咸憑蘇錫克絕殺得手,同樣以1:0小勝而回。情況與白禮頓一樣,由於同組弗賴堡大勝奧林比亞高斯5:0,韋斯咸、弗賴堡兩軍同得12分,最後一輪分組賽,韋斯咸會喺主場恭候弗軍,爭奪首名直接出線資格。