尋晚歐霸盃分組賽第4圈，賽果都算正路，喺C組陷於苦戰嘅羅馬，以1:1逼和貝迪斯，4戰4分排第3，總算保住出線希望。
羅馬近期都幾黑仔，啱啱叫打番起，點知王牌戴巴拿又要養傷，加上辛尼奧路停賽，羅馬今場個陣都幾殘吓，對手仲要係西甲黑馬貝迪斯，上次羅馬主場對佢哋都要輸1:2，今場作客，更加難打。
貝迪斯喺上半場佔較多優勢，期間羅馬比洛迪雖然入過波，但因越位而食詐胡，去到34分鐘，貝迪斯中場簡拿利斯遠射，省中羅馬守將改變方向，先開紀錄。羅馬上半場頗多失誤，貝迪斯個入波，就係源於羅馬中場交失波所致。
去到下半場，羅馬眾將好似瞓醒咗咁，壓住貝迪斯嚟攻，53分鐘，比洛迪接應傳中建功，追成1:1，最終雙方亦以呢個比分完場。
羅馬4戰過後4分排第3，落後盧多格德斯3分，而貝迪斯則積10分，已肯定出線，換句話講，羅馬晉級仲有價講。
摩佬賽後受訪話:「上半場嘅表現簡直係災難！換邊之後，你哋見唔見到佢哋(羅馬球員)隻耳仔紅晒？因為我喺更衣室喪鬧佢哋！好彩鬧完，表現有改善喇！」
另邊廂，阿仙奴同曼聯齊齊小勝對手、贏波輸盤，當中阿仙奴喺A組累積9分，嚟緊補賽對燕豪芬，只要拎1分就足夠出線；而曼聯同樣9分，拎多1分就肯定晉級。
