達雲紐尼斯今季表現大有進步，不過周五凌晨歐霸盃第3輪分組賽，佢又出現世紀miss，唔少球迷更認為，呢球媲美費蘭度托利斯當年嘅經典！
達雲紐尼斯今季歐戰同聯賽入咗5球，今場歐霸盃5:1大勝圖盧兹，呢位烏拉圭中鋒亦都有士哥，不過賽事焦點，係佢64分鐘單刀，扭過埋門將面對空門，可惜最後一腳竟然射中柱，雖然加芬比補中，但達雲都尷尬到雙手掩面。
達雲紐尼斯呢個世紀「miss」，令網民聯想2011年前利物浦中鋒費托，轉投車路士之後，對曼聯時扭過門將面對空門，竟然一腳射出門框之外，球迷既玩達雲，又抽埋費托水，一箭雙雕。
紅軍領隊高普賽後話：「達雲好出色，扭過後衛同埋門將。空門中柱係有啲鬧劇成份，但加芬比補中，所以ok啦。達雲紐尼斯係一個陽光男孩，我哋希望佢保持樂天嘅性格。」
鬧劇歸鬧劇，利物浦大勝之後，3戰全勝位居榜首，出線定過抬油。遠籐航今仗用頭槌建功，攻入加盟紅軍後首個入波。
另外一支英超球隊白禮頓，亦得到球會史上首場歐洲賽事勝仗，祖奧柏度、法迪建功，主場2:0挫阿積士，3戰4分保持出線機會。
至於韋斯咸就慘啲，佢哋尋晚作客不敵希臘奧林比亞高斯1:2，歐洲賽跨季17場不敗紀錄斷纜，不過暫時仍喺A組位居榜首。
