【歐霸盃】小勝阿特蘭大 利物浦仍出局 高普認球員太攰;利華和韋斯咸入4強 44場不敗!

利物浦冇製造奇跡,周五凌晨歐霸盃8強次回合,雖然作客1:0贏阿特蘭大,但總比數仍輸1:3出局。相反利華古遜89分鐘入波,作客1:1和韋斯咸,總比數贏3:1,除晉級4強,更重要意義係距離以不敗姿態成為三冠王嘅奇跡,又行近一步!

唔少人曾經期待,今屆決賽會由利物浦對利華古遜,高普對曾經係佢接班人大熱嘅沙比阿朗素;但隨住紅軍首回合主場吞3蛋,機會已微乎其微。

利物浦今場最少要淨勝阿特蘭大3球,先有機會神奇反勝。開賽7分鐘,沙拿就射入12碼開紀錄,之後利物浦繼續圍攻,39分鐘,沙拿單刀趁門將出迎而喺禁區外笠射,可惜偏離目標。換邊後利物浦攻勢反而減弱,只得2次射門,最終僅勝1:0出局。

賽後,高普承認球隊疲態畢露:「我哋出局,最主要原因係首回合主場表現太差,今場我哋開局幾好,但去到下半場,明顯維持唔到高強度節奏。恭喜阿特蘭大,佢哋值得晉級。」出局後,利物浦得番英超一條戰線,高普話會全力衝冠:「出局係失望嘅,但係冇沮喪,依家我哋可以專注番聯賽,呢個亦係我哋唯一要做嘅事。」

唔止利記,曼城、阿仙奴亦於歐聯8強止步,三雄疊埋心水,砌埋剩低6場波,睇吓邊隊最後成為英超冠軍。

至於利華古遜剛登基德甲冠軍,不過喺歐霸對韋斯咸幾乎出事。錘仔幫次回合好醒神,力追首回合輸0:2失地,米查利安東尼奧13分鐘開紀錄,之後大舉狂攻,睇怕利華會錄得今季首度輸波之時,沙比軍團再展示驚人鬥志,費林邦89分鐘追和1:1,兩回合贏3:1之餘,亦將今季各項賽事不敗紀錄,延續至44場。

另係兩支晉級球隊係羅馬同馬賽。歐霸盃4強對賽,馬賽對阿特蘭大、羅馬對利華古遜。5月3及10日凌晨舉行兩回合賽事。