歐霸盃打晒全部分組賽，曼聯、羅馬最後一輪雖然贏波，但都只能做小組第2名，要踢附加賽，隨時抽中對巴塞隆拿、祖雲達斯或歐霸之王西維爾！
歐霸盃上年起行新例，每組首名直入16強，每組第2名要踢附加賽，抽籤對歐聯各組第3名，晉級球隊先至可以躋身16強。附加賽抽籤下周一同歐聯16強一齊搞，明年2月16號踢首回合。
今次歐聯第3名，實力相當強勁，巴塞隆拿、祖雲達斯已經不得了，仲有西維爾、阿積士、利華古遜等，所以喺歐霸排小組第2，其實係相當惡啃。
曼聯作客皇家蘇斯達，要凈勝兩球或以上，先可以直接出線。佢哋其實有個好開始，18歲阿根廷小將加拿祖被派做正選同C朗合作攻堅，後生仔不負所託，17分鐘已接應其偶像C朗傳送、先開紀錄。18歲251日，加拿祖取得曼聯一線隊首個入球。
去到41分鐘，更有擴大比數嘅黃金機會，但C朗未能把握皇蘇後衛失誤，單刀挑射高出。之後皇蘇稍為主動，曼聯又係靠迪基亞連環神救，先至保住不失，最終小勝1:0完場。
皇蘇、曼聯同得15分，對賽成績相同，皇蘇以較佳球差成為E組首名，直接晉級16強，曼聯要踢附加賽，睇吓對邊隊歐聯第3名。
阿仙奴主場對蘇黎世，贏波即肯定壓倒燕豪芬，成為A組首名。阿仙奴繼續用半主力半後備陣容出擊，最終由基蘭泰亞尼射入全場唯一一球，直入16強。
羅馬主場對保加利亞球隊盧多格德斯，必需贏波至可以做第二名，和都會出局，因為貝迪斯晨早已肯定首名出線。羅馬今場坐過山車，上半場先落後，下半場憑兩個有爭議性12碼反先，跟住對手慘食詐胡，到最後辛尼奧路射成3:1完場，羅馬有運全取3分。
另一支意大利球隊拉素，真正慘情出局，F組4隊同得8分，飛燕諾、米迪蘭特藉較佳得失球差晉級，拉素需降格踢歐協聯。
歐霸盃分組賽首、次名球隊
A：阿仙奴、燕豪芬
B：費倫巴治、雷恩
C：貝迪斯、羅馬
D：聖基萊斯聯、柏林聯
E：皇家蘇斯達、曼聯
F：飛燕諾、米迪蘭特
G：弗賴堡、南特
H：費倫斯華路士、摩納哥
歐聯第3名
阿積士、利華古遜、巴塞隆拿、士砵亭、
薩爾斯堡、薩克達、西維爾、祖雲達斯
