沉寂多年嘅曼聯，今季終於要爆喇！周五凌晨歐霸附加賽，曼聯憑費特同安東尼各建一功，主場以2比1反勝巴塞隆拿，兩回合計贏4比3，昂然晉級16強。
由落後到反勝，坦哈格半場變陣相當關鍵，後備安東尼落場做側擊，拉舒福特踢正箭頭，殺巴塞一個措手不及，難怪坦克喺賽後，亦話呢場波係佢曼聯生涯「最偉大勝利」。
曼聯鬥巴塞呢個歐聯決賽級戲碼，首回合雙方踢成2比2，成為今屆歐霸最經典比賽，今仗繼續以快打快，18分鐘，般奴犯錯輸12碼，羅拔利雲度夫斯基操刀中鵠，巴塞上半場領先1比0。下半場，坦克收起韋格賀斯，起用安東尼，2分鐘，費特即入楔得手扳平，73分鐘，安東尼更以一球靚窩利建功，報答坦克嘅信任。
有一個數據值得留意，係曼聯喺今季已經第19次由後備球員入波，數據冠絕5大聯賽，早前坦克嘅8人即場分析團隊曝光後，唔少球迷都讚嘆，坦克對所有細節嘅嚴謹同追求，就係曼聯復甦嘅關鍵。
坦哈格話：「巴塞喺西甲領先皇馬8分，而皇馬就大炒利物浦，只要贏到巴塞，就贏到世上任何球隊！今場係我執教曼聯後，最偉大嘅勝利！」
8支歐霸附加賽勝方誕生後，16強對碰今晚隨即抽籤，由附加賽勝方對分組賽首名出線球隊，而16強亦唔會抽中同國，亦即係話，曼聯唔會抽中阿仙奴，餘下7隊，實力上亦不及曼聯，只要發揮應有水準，入8強應無問題。
首名球隊：
聖基萊斯聯、阿仙奴、
弗賴堡、費倫斯華路士、
飛燕諾、貝迪斯、
皇家蘇斯達、費倫巴治
附加賽球隊：
曼聯、利華古遜、
柏林聯、祖雲達斯、
羅馬、士砵亭、
西維爾、薩克達
歐霸同足總盃已殺入16強，聯賽盃決賽周日上演，英超亦重燃爭標希望，曼聯目前叫四飛，到底最終佢哋會有幾多隻盃落袋？拭目以待！
