【歐霸】16強出爐!雙雄晉級 幫意甲歐聯第5席搶分;馬賽靈魂!奧巴美揚榮升歐霸士哥王

歐霸附加賽尋晚終於踢完,焦點球隊AC米蘭,兩回合計贏雷恩5:3出線;至於羅馬就喺主場同飛燕諾踢成1:1,兩回合計2:2,羅馬互射12碼勝出晉級。

由於下屆歐聯改制,今屆歐洲賽系數最高嘅兩個聯賽,將會額外多1個歐聯席位,所以A米同羅馬晉身歐霸16強,亦即意味意甲今屆7支歐戰球隊全部晉級,本身喺賽前已有15,142分排第1嘅意甲,嚟緊有更多機會拋甩對手,歐聯第5席相當穩陣。

數番今屆7支出戰歐洲賽嘅意甲兵,分別係歐聯嘅國際米蘭、拉素及拿玻里,3隊喺首回合共獲2勝1和。至於歐霸3隊係羅馬、AC米蘭同阿特蘭大,另歐協聯則有費倫天拿,係今屆歐戰唯一仍未有球隊出局嘅聯賽。

相反,法甲就相當失威,4支球隊喺歐霸盃附加賽出擊,只係得番馬賽一隊入到16強。值得一提係馬賽今場其實都好驚險,佢哋首回合2:2和薩克達,之後炒咗教練加度素,由早前非國盃嘅黑仔領隊加錫頂上(科特迪瓦喺分組賽僅以第3名出線後炒加錫,然後一路封王)。

呢場波馬賽12分鐘就輸12碼落後,不過前阿仙奴隊長奧巴美揚挺身而出,佢先喺23分鐘幫馬賽扳平,下半場再助攻畀伊斯美拿沙亞入波反超前,之後干度比亞埋齋,馬賽贏3:1晉級。

奧巴美揚離開車仔後再上高峰,今屆歐霸入咗7球,生涯共累積31個歐霸入波,成為歐霸史上入球王,如果計埋歐霸盃前身歐洲足協盃,auba亦追平瑞典名將軒歷拿臣,只要嚟緊入多1粒,就可獨佔歐霸/歐協首席射手紀錄。

歐霸16強對賽將於今晚抽籤:
布拉格斯拉維亞(捷克)、利華古遜(德國)、
白禮頓(英格蘭)、韋斯咸(英格蘭)、利物浦(英格蘭)、
阿特蘭大(意大利)、格拉斯哥流浪(蘇格蘭)、維拉利爾(西班牙)

卡拉巴克(阿塞拜疆)、布拉格斯巴達(捷克)、
馬賽(法國)、弗賴堡(德國)、
AC米蘭(意大利)、羅馬(意大利)、
賓菲加(葡萄牙)、士砵亭(葡萄牙)