周五凌晨時份，歐霸盃4強次回合，祖雲達斯將作客西維爾，而其中1個值得留意嘅祖雲達斯球員，就係守衛加迪。呢位球員出身寒微，3年前仲踢緊丙組，估唔到今時今日已經於歐霸盃取得2個入球，進步速度之快令人咋舌。
現年24歲嘅加迪，成長過程並唔似一般職業球員。事關家庭環境麻麻，17歲時阿爸失業，令到佢要提早出嚟社會，為搵食真係乜都肯做，比如做過裝修、砌磚、裝窗、屋頂防漏等工作，亦曾經去超市做執貨。
雖然返工都幾辛苦，但佢依然無放棄足球，放工即到業餘或地區球隊接受訓練，有時操波操到夜晚11點先食飯。瞓到3、4點又要起身準備返工。
如是者捱咗幾年，2020年被丙組球隊柏迪亞睇中，佢哋見加迪大大隻成1米90，希望簽佢做職業球員。當年加迪內心好掙扎。開心嘅係職業足球員夢想達成，擔心嘅係做個丙組仔薪酬唔高，未必養得掂屋企。不過最終得到家人支持，正式簽紙踢波搵食。
踢柏迪亞期間，加迪曾經代表球隊與祖雲達斯U23對賽，雖然當時柏迪亞輸波，但加迪嘅出色演出就吸引到祖記球探，所以將佢個名放入觀測名單當中。1個球季之後亦即2021年暑期，加迪就被乙組球隊費辛隆尼以25萬歐元收購。
加迪於乙組表現一樣咁搶鏡，祖雲達斯見佢咁有潛質，於2022年1月就以750萬歐元將佢成功收購，當時祖記無即刻帶佢返都靈市，畀佢留喺費辛隆尼踢埋半季乙組賽事，先至去祖雲達斯報到。加迪無話加盟甲組隊就飄飄然，反而更加努力踢好每場比賽，結果當選年度意乙最佳球員。
今季加迪正式著起祖雲達斯15號球衣，其中歐霸盃8強首回合對士砵亭，取得加盟祖雲達斯首個入球，協助球隊贏1比0。去到上星期歐霸盃4強首回合對西維爾，加迪又建奇功，於補時第7分鐘頭錘入球，助祖記逼和對手1比1。
以前聽過首歌叫戲班小子，其中一段係咁寫：「滄桑多變 世事傳奇，只要努力肯衝刺，一翻跟斗幾個際遇，時來運到即沖天飛」。用呢節歌詞嚟總括加迪呢幾年嘅變化，可謂相當之貼切。
