經歷0比7慘案後，曼聯急需一場清脆勝仗重振軍心，結果佢哋做到咗，周五凌晨歐霸盃16強首回合，主場4比1大勝貝迪斯。
周日經過球會歷史上最恥辱性一役，領隊坦哈格鼓勵球員，唔好懷憂喪志、唔好糾結於賽果，而係要糾結於表現。曼聯球員亦以表現回報主帥，踢番出未慘負利物浦前嘅水平。
開波6分鐘，招牌快攻再現，又係拉舒福特開紀錄。雖然32分鐘被追和，但曼聯下半場攻勢浪接浪，成功打散貝迪斯防線，先有安東尼射入世界波，跟住般奴費南迪斯接應角球頂入，中鋒韋格賀斯完場前執死雞，射成4比1，紅魔半隻腳踩入8強，下周五凌晨進行次回合。
般奴費南迪斯、安東尼、韋格賀斯，對利物浦後都成為重點批評對象，特別係般奴身為隊長，冇鼓勵隊友之餘更大鬧情緒，唔追波、推旁證、怨隊友、插水、要求離場等等，好多人指佢唔配再做隊長。
今仗佢依然配戴隊長臂章，亦成為今場波表現最突出一人，除咗自己頭槌破網，拉舒福特及安東尼入波，佢都有份策動，以行動報答坦哈格信任。
安東尼、韋格賀斯被批評唔夠料踢雙紅會，但今場面對其他對手，仍要打爭氣波。安東尼世界波固然精彩，但真正令紅魔擁躉感動嘅係韋格賀斯。
韋格賀斯加盟曼聯後，踢咗15場波，82分鐘，呢位荷蘭中鋒終於取得第2個入球，更加係佢喺奥脫福首個士哥。意義非凡、壓力大減，韋格賀斯入波後滑向角球旗慶祝，眼含淚水、高聲大叫，帶嚟感人時刻。
阿仙奴作客士砵亭，由中堅沙列巴頭槌先開紀錄，雖然之後被反超，幸最終仍藉對手日本外援守田英正擺烏龍，打和2比2，下周五凌晨返主場踢次回合，晉級機會依然較高。
