C朗繼續冇波入，仲浪費唔少機會，好在有後備奇兵補飛。曼聯於周五凌晨歐霸盃E組作客塞浦路斯，對奧摩尼亞先輸一球下，下半場換入拉舒福特、馬迪爾，即時扭轉敗局，反勝3:2，全取3分。
輸完大大殻畀曼城，紅魔今仗擺明想贏番場振士氣，除咗C朗、卡斯米路有得做正選，艾歷臣、般奴費南迪斯、安東尼、辛祖等常規主力都出齊。
前30分鐘，曼聯都控制戰局，但球員力度不足，走位呆板，推進節奏緩慢，即使有入球機會，C朗同般奴亦先後錯失。
奧摩尼亞實力唔止差一皮，只靠鬥志死守，仲喺35分藉曼聯送禮，意外打開紀錄。當時曼聯全軍壓上，左閘馬拉斯亞企防線最後，但佢控波甩腳，畀奧摩尼亞得到單刀機會，安沙里法特射成1:0。
計波明明高對手好多，落後嘅曼聯改變左路配搭，力圖扭轉局勢。下半場開波，拉舒福特入替辛祖，梳爾代替馬拉斯亞，增加直接攻門能量，作用立竿見影，進攻節奏同濶度大幅度增強。53分鐘，福仔接應般奴長傳，禁區邊靚控靚射，為曼聯扳平。
另一個後備仲勁，安東尼馬迪爾61分鐘落場，63分鐘即接應福仔靚傳射入，曼聯2:1反先。馬迪爾腳風好順，上仗對曼城亦係後備入替下，完場前梅開二度。
C朗冇波入，但唔知有心定無意，喺84分鐘半傳半射下送出助攻，福仔射成3:1，奧摩尼亞85分鐘追至2:3完場。同組皇家蘇斯達作客2:0挫舒列夫，3戰全勝9分領先，曼聯6分，舒列夫3分，奧摩尼亞0分。
C朗依然落力，但幾時先可以搵番入波觸覺？下半場後段，佢曾經門前幾碼射門，但竟然中柱，完場前兩個入波良機，亦一一錯失，信心、狀態明顯係近十幾年來新低，最大鑊係見到好多隊友都專登造波畀佢，某程度上影響進攻流暢度，世界盃越嚟越近，喺葡萄牙一片反C朗嘅聲音底下，佢嘅情況，的確令人相當擔心。
