歐霸盃8強首回合，祖雲達斯主場對士砵亭。唔知係咪畀人鬧得多打法保守，今場祖記領隊阿里基排陣都幾進取，擺大個頭以3-4-3應對葡超士砵亭，由費達歷高基艾沙、迪馬利亞及米利克打3箭頭，至於拉賀域先做後備。
祖雲達斯確係幾進取，比賽初段已有幾次具威脅埋門。第11分鐘，迪馬利亞大腳長傳，禁區內費達歷高基艾沙一控一射動作流暢，皮球直飛遠柱以為入得，可惜被士砵亭門將安東尼阿丹擋出。上半到尾段，士砵亭都搶返唔少攻勢，唯未能取得入球。
第41分鐘，祖雲達斯正選門將施捷斯尼，於無任何碰撞之下捂住個心口，隊友上前問過情況後就急急揚手，叫醫療員盡快入場檢查。施捷斯尼可能係心臟出問題，故隨即退場改由佩連把守最後一關。
下半場雙方互有攻守，直到第73分鐘終於有入球出現。祖記迪馬利亞傳中，士砵亭門將安東尼阿丹打手槌落空，後備入替嘅拉賀域頭頂空門，先被士砵亭球員於白界前擋出皮球，祖記後衛加迪近門「執雞」成1比0。
士砵亭失守後瘋狂反擊，第91分鐘更幾乎追和。當時干沙維斯於小禁區內撞射，祖記門將佩連用腳檔住，士砵亭球員赫達比連再補射，又被佩連救出。最終雙方維持賽果，兩隊於下星期再鍊過，屆時輪到士砵亭返主場。
據報，施捷斯尼已經接受過隊醫檢查，球隊已於社交網站表示問題不大。但呢段時間會繼續為波蘭門將作檢測，暫時未知意甲短期內能否出場。實在施捷斯尼效力阿仙奴及羅馬期間，都被人拍攝到佢有抽煙習慣。經過今場比賽之後，係時候考慮戒煙嘞。
