雖然唔係歐聯，巴塞隆拿、曼聯於歐霸盃附加賽首回合，依然冇令球迷失望，全場互攻，出現35次射門，最終2:2打和。紅魔作客和波英雄，依然係拉舒福特。
巴塞魯營球場，擠滿90,255名觀眾，見證一場精彩大戰，進攻之多之快，目不暇給。下半場由50分鐘開始，更係高潮不斷。
巴塞先由後衛馬高斯阿朗素，角球助攻得手開紀錄，但52分鐘即被扳平，費特洛迪古斯一腳直傳，拉舒福特殺入禁區，角度雖然好窄，但佢快腳勁射，喺巴塞門將達史特根腳邊死位入網。
福仔59分鐘又嚟料，邊線一次盤扭成功後傳中，般奴揩到個波改變方向，祖利斯古迪解圍不成擺烏龍，曼聯反超前。巴塞瘋狂反撲，多次攻門畀迪基亞救出，去到76分鐘，拉芬夏比洛尼無心插柳，右路傳中想畀羅拔利雲杜夫斯基，但冇人掂波下直飄遠柱入網，追和2:2完場。
拉舒福特1入球1助攻，保持超旺勢頭。世界盃結束之後，佢各項賽事出場16次，已經入咗14球，歐洲五大聯賽無人能及；進入2023年入11球，同樣5大聯賽最多。更重要係本賽季至今，福仔各項賽事已有22個士哥，追平個人單賽季歷史紀錄，連巴塞教練沙維都點名，盛讚福仔係歐洲最危險前鋒。
下周五凌晨，兩軍會再喺奧脱福碰頭，爭奪16強席位，但巴塞面臨好大困難，兩大年輕中場核心好可能同時缺陣。加維食黃牌要停賽，柏迪上半場尾段因大腿肌肉受傷，主動示意要退下火線，有待進一步檢驗傷勢。
