歐霸盃分組賽開波，曼聯喺E組出師不利，主場0:1輸畀皇家蘇斯達。C朗盃賽終於做番正選，但踢落力不從心，同隊友配合亦唔理想，今季上陣297分鐘，仍然陷入球荒！
曼聯今個夏天再入貨，真係好疊馬，去到歐霸可以大輪換。中路防守，終於出麥佳亞拍住連達路夫；433陣式，中場費特、艾歷臣外，卡斯米路加盟後首度正選；仲有C朗時隔20年後再踢歐霸盃（佢曾為士砵亭踢過前身歐協），拍住艾蘭加、安東尼攻堅。
曼聯喺英超4連勝，全部踢穩陣波，主場贏利物浦、阿仙奴，都係打穩守突擊，嚟到對皇蘇，開波初段依然以不失球為優先，唔盲目搶攻。
直至上半場中後段，見對手欠威脅，先開始壓上主攻，C朗曾經頭槌破網，但越位在先；佢的確好努力咁走位，隊友亦盡量餵波畀大佬，但幾次近門跳頂，時間都欠準繩，速度亦爆唔過對手後衞，實際威力唔大。
出咗C朗，曼聯進攻速度明顯下降，唔同前4仗咁靈活快速，參與進攻球員亦顯得縛手縛腳。以目前曼聯踢法，正中鋒出拉舒福特或馬迪爾，效果應該好過C朗。
除狀態問題，C朗一如既往，經常黑口黑面，同隊友缺少互動鼓勵，曼聯球員士氣，明顯冇早幾場咁高漲。莫非如杜曹所講，C朗已成為更衣室毒瘤？
皇蘇攻勢少，但59分鐘藉利辛度馬天尼斯一次極具爭議性嘅涉嫌手球，巴斯文迪斯射入12碼，之後一路穩守，最終皇蘇作客贏1:0。
阿仙奴收拾被曼聯破全勝之身嘅心情，歐霸A組打響頭炮，馬昆奴斯、尼基迪亞入波，作客2:1挫蘇黎世。
羅馬意甲吞烏甸尼斯4蛋後，未有即時反彈，C組作客1:2負保加利亞球隊盧多格德斯。
