'

【歐霸】擺脫心魔!C朗解凍做正選 唔再忟憎享受比賽 射入今季奧脱福第一球

周五凌晨歐霸盃分組賽,C朗解凍後復出打正選,仲要有波入,曼聯主場3:0挫摩爾多瓦球隊舒列夫。經過5輪賽事,曼聯有12分,落後皇家蘇斯達3分,下仗分組賽將會交鋒,決定直接出線16強嘅席位。

曼聯今仗全面掌控戰局,44分鐘達洛治接應角球,頭槌先開紀錄,拉舒福特65分鐘亦以頭槌破網,之後輪到C朗。

C朗入球出現於81分鐘,般奴費南迪斯右路傳中,C朗跳頂被龍門撲出,但佢快步衝前補射入網,今季首度主場取得士哥,球會級賽事第701球。

入波後冇招牌跳躍慶祝,C朗反而平靜微笑扮瞓覺,同埋仰望奥脱福看台,接受隊友祝賀。事實上,今仗佢「情緒管控」係做得比之前好,冇咗躁動怨氣,能冷靜投入比賽,並不時向隊友傳送作鼓勵。

上周中英超對熱剌,C朗未完場擅自離開球場,引起軒然大波,被坦哈格處罰,除冇得隨隊對車路士,更要佢單獨練習。經過對話後,坦哈格決定將其解凍,並一如既往,歐霸盃用C朗打正選。

或者知道正選得來不易,C朗今場跑動更多,狀態亦較以往明顯回升,除入波外,更融合全隊踢法,孤軍作戰感驟減,構成唔少埋門威脅,亦食過一個詐胡。

安東尼做乜勁?

另一英超球隊阿仙奴,今仗繼續以半主力半後備陣容出擊,可惜最終仍以0:2不敵燕豪芬,不過阿仙奴仍領先燕豪芬2分,下仗主場只要主場擊敗蘇黎世,仍可無須理會其他賽果,直接進身16強。

阿仙奴狀態下滑。

強隊之中,C組羅馬有運仔,作客2:1險勝赫爾辛基之餘,亦多得貝迪斯冇放軟手腳,作客1:0挫盧多格德斯。羅馬、盧多格德斯都有7分,兩隊最後一輪決戰,羅馬一定要贏,若然和波亦會因對賽成績較差而被淘汰。

羅馬險勝,摩佬寬容番啲啲。