【歐霸】打破利華不敗身!阿特蘭大捧盃 狂破紀錄;陸文入3粒 英冠人球變歐霸英雄

利華古遜不敗神話終告破滅!歐霸盃決賽,意甲球隊阿特蘭大憑陸文(Ademola Lookman)大演帽子戲法,以3:0力挫利華古遜,打破球會61年錦標荒之餘,仲破埋利華51場不敗金身,威盡球壇。

成季德甲未輸過,嚟到歐霸盃決賽先嚟大敗,利華教練沙比阿朗素當然失望:「輸波其實應該早啲發生,嚟到呢場咁緊要嘅大戰先輸波,打擊真係好大,我哋要正面面對傷痛……對手一對一、搶奪非常出色,我哋要從今日起好好學習。」

至於曾於英冠搵食嘅阿特蘭大英雄陸文,呢場波個人獨取3球,當然開心到爆:「我人生中最美妙嘅一晚!我哋做到咗喇!我為自己嘅進步感到開心,希望今晚只係開始,之後會有更多好似今晚嘅晚上!我哋要開P慶祝,大家創造咗歷史!」

26歲嘅陸文係尼日利亞國腳,出身自查爾頓青訓,之後轉投愛華頓後上陣機會唔多被外借,之後輾轉效力德甲萊比錫,但同樣成為人球,直到前年加盟阿特蘭大先企穩陣腳,成為阿特蘭大奪得61年來首個錦標嘅功臣,亦係歷來首位喺歐霸決賽連中三元嘅非洲球員。

利華古遜今場踢3-4-3,主將邦尼菲斯被收起,穫斯、艾迪利、基馬度攻堅,12分鐘,薩柏哥斯達傳入禁區,陸文近門射成1:0。26分鐘,又係陸文,佢推過加列沙卡喺禁區頂射入,阿特蘭大半場領先2:0。換邊後利華加強火力,但阿特蘭大嘅防守超穩健,去到75分鐘,史卡馬卡突破,引咗4名守將後傳畀陸文,陸文完成帽子戲法,阿特蘭大3:0大勝,捧走歐霸盃。

阿特蘭大攞到球會史上第一個歐洲賽冠軍,打破61年錦標荒,同時獲得歐聯資格。利華古遜51場不敗金身雖然被破,但佢哋仲有德國盃決賽,要盡快收拾心情,爭取成為雙料冠軍。