【歐霸】利華瘋狂逆轉 神跡入8強!利物浦兩回合轟11球!今晚抽籤 沙比鬥高普?

歐霸盃周五晚8強抽籤,會唔會就有利華古遜對利物浦,沙比阿朗素vs高普?

呢個場面本來冇機會出現,因為周五凌晨16強次回合,利華主場對阿塞拜疆勁旅卡拉巴克,去到67分鐘已失兩球,總計落後2:4,但利華把握比對手打多個嘅優勢,於72分鐘、補時3分鐘、補時8分鐘先後建功,完成驚天逆轉,最終反勝3:2,兩回合以5:4淘汰卡拉巴克。

利華首回合作客,亦係落後兩球下追和,當時後備前鋒舒希克補時入波成為英雄。估唔到佢今仗再次雷霆救駕,以後備身份包辦補時兩個入波,令利華今季各項賽事不敗紀錄增至37場,繼續向三冠王進發。

領隊沙比阿朗素賽後話,利華能夠扭轉逆境,勝在有決心同熱情。呢兩個特點,正正係高普嘅利物浦所擁有。紅軍亦進入遇神殺神,遇佛殺佛境界,即使首回合作客已贏5:1,次回合返到主場,成班球員依然唔慳力,又大勝6:1,兩回合11:2屠殺布拉格斯巴達。

開波僅14分鐘,達雲紐尼斯、波比奇勒、沙拿、加普已射成4:0;加普下半場入多球,蘇保斯拉爾射成6:1完場。利物浦比利華更巴閉,有機會做4冠王,今個周日又會作客曼聯,踢英足盃8強。

利記又大炒一場。

歐霸盃8強份子,仲有羅馬、阿特蘭大、韋斯咸、馬賽、賓菲加、AC米蘭,份量十足。周五晚7點會開始歐聯抽籤,跟住輪到歐霸。