有「韋拉」加持，帶來爭冠吉兆！傳奇隊長韋拉，曾領導兵工廠雄霸英超，依家「新韋拉」現身，雖然唔係隊長，但可唔可以走上同樣軌跡？
阿仙奴繼續高奏凱歌。周五凌晨歐霸益A組，主場3:0大勝挪超波杜基林特，2戰全勝居榜首。
今仗阿仙奴用大量副選，留晒力準備周日大戰利物浦。一班副選中，以葡萄牙新星法比奥韋拉最搶鏡，貢獻一射一傳。
尼基迪亞23分鐘開紀錄，4分鐘後洛賀丁接應法比奧韋拉傳中頂入，完場前6分鐘，韋拉接應加比爾捷西斯傳中抽入，阿仙奴大勝3比0。
同樣係韋拉，功勳隊長Patrick Vieira 1996-2005年効力，成就傳奇兵工廠，3次英超冠軍，包括神跡全季不敗，仲有4次足總盃冠軍，喺好多廠迷心目中，呢位現任水晶宮主帥，佢嘅貢獻只次於雲格、亨利。
「新韋拉」係法比奧韋拉（Fabio Vieira），同樣係中場，只有22歲，上季為波圖上陣27次，入6球、助攻14次。季前阿仙奴以3000萬鎊成功收購佢嗰陣，曾引起唔少質疑，認為「新韋拉」唔會帶來助力。
事實上，根據領隊阿迪達部署，目前法比奧係隊長馬田奧迪加特嘅後備，但機會有限下，「新韋拉」仍然成功交出良好表現，只係3次正選，就有兩個入波同1次助攻，中場鋪橋搭路同助攻，絕對唔比馬田奧迪加特遜色，大大增加調動籌碼。
阿仙奴球迷，對韋拉呢個名字特別有感情，佢哋見法比奧表現咁好，已經將當年畀韋拉打氣歌，重新包裝過，變為法比奧專屬打氣歌，寄望呢位「新韋拉」，可以協助球隊走上中興之路。
