【歐霸】估佢唔到!利物浦主場吞阿特蘭大3蛋 高普又失一冠嬲爆 往績顯示會有「反cup」奇跡?

周五凌晨歐霸盃8強首回合爆冷門,利物浦主場竟然慘負阿特蘭大0:3,下周次回合仲要作客,反cup晉級?如果咁都做得到,就真係奇跡中嘅奇跡。

唔少紅軍迷以至球員,希望以4冠王送別高普,特別係神奇捧走聯賽盃後,呢個信念更為強烈,但繼足總盃畀曼聯淘汰,歐霸盃又再遭遇痛擊,輸畀阿特蘭大,呢場更係利物浦近14個月來,首次主場敗仗。

正如領隊高普賽後嬲爆咁話,利物浦渣到爆,冇嘢好講,佢哋今仗有輪換,進攻三叉戟用艾利洛同加普,支援達雲紐尼斯,後防用干拿迪、祖高美斯及森美卡斯擔正。

上半場紅軍頗多攻勢,但達雲紐尼斯錯失多次機會,包括15分鐘單刀射失。26分鐘,艾利洛禁區右路起腳,個波已越過門將梅素頭頂,可惜中楣後再中柱彈出,相當運滯。

利物浦失黃金機會,阿特蘭大就喺38分鐘靠一次右路進攻,撕破紅軍防線,薩柏哥斯達傳入禁區畀史卡馬卡起腳,基拿靴落地較慢,畀個波喺佢「格肋底」漏入,客軍意外領先。

高普賽後有彈防線企位差,60分鐘又係輸右路反擊,迪基達拉妙傳到禁區,史卡馬卡無人看管下輕鬆熨入,阿特蘭大領先至2:0。即使換入沙拿、蘇保斯拿爾、羅拔臣同路爾斯戴亞斯,但進攻質素唔見大改善,之後連傷癒嘅迪亞高祖達亦落場,79分鐘沙拿入波,可惜越位在先;83分鐘,蘇保斯拿爾後場犯錯,畀史卡馬卡「打荷包」反擊,妙傳艾達臣射門,基拿靴擋出,柏沙歷再補一腳,奠定3:0大勝完場。

利物浦主場吞3蛋,下周要去意大利踢次回合,晉級機會微乎其微。雖然紅軍過去喺歐洲賽有多次「反cup」經典,例如2018/19球季歐聯4強對巴塞,試過首回合落後3球,次回合反勝4:0晉級,但嗰次次回合係主場,今次作客,咁都有得「反cup」?

不過,信念強嘅利物浦球員或球迷,會舉呢個例子:2020年歐聯小組賽,利物浦曾作客5:0大勝阿特蘭大,嗰場波祖達上演帽子戲法,沙拿同文尼都有波入。

其他8強首回合,唔去教利物浦嘅沙比阿朗素,帶住利華古遜繼續橫掃,主場2:0贏韋斯咸,不敗紀錄增至42場。意甲內鬨,羅馬作客1:0挫AC米蘭,賓菲加主場2:1贏馬賽。