車路士缺正中鋒係人都知，即使波查復出，正中鋒位置亦要買人先掂。但其實，今季3大歐洲賽決賽，都見到車仔棄將嘅身影，其中兩位，仲要係車仔最恨有嘅正中鋒嚟！
羅馬今晚會同西維爾決一高下，爭奪歐霸王者寶座。羅馬除咗有摩佬、馬迪同史摩寧，另外中鋒譚美阿巴謙，亦曾於英超打出名堂。
譚仔係車路士青訓產品，於外借維拉期間大爆發，40次披甲入26球；2019/20，車仔喺限買令之下，譚仔獲得回收重用，總計47戰入18球，效率唔曳。
可惜隨住林柏特被炒，譚仔喺杜曹麾下不獲重用，之後轉投羅馬全面重生，上季53戰入27球，今季譚仔雖然喺羅馬略為跌Watt，但球隊傷兵太多，佢自己亦曾受傷，影響咗發揮。
好彩，羅馬仍然能殺入歐霸決賽，而譚仔本身已經喺車路士攞過歐聯同歐超盃冠軍，上季則喺摩佬麾下封王歐協聯，如果今晚贏埋，就會達成新歐戰大滿貫嘅創舉。
除咗譚美阿巴謙，前車仔後衛艾美臣柏美尼，亦曾經隨軍捧過歐霸、歐聯、歐超盃，依家踢緊嘅韋斯咸已打入歐協聯決賽，呢位意大利後衛，亦有機會完成大滿貫嘅壯舉。
當然，仲有仍然係車仔球員、但外借到國米嘅前鋒盧卡古，佢嚟緊亦會出戰歐聯決賽鬥曼城。
