美斯又嚟料！今季夏蘭特強勢彈出，近期多個媒體都摷番10年前美斯數據，去與布歐相比，但美斯用行動話畀大家知，10年後佢都仲Keep住有貨交，尋晚PSG大炒海法馬卡比7:2，美斯兩入球兩助攻，刷新多項紀錄！
PSG今仗強陣出擊，基利安麥巴比、尼馬同美斯悉數披甲，合組最強三叉戟，開賽19分鐘就有斬獲，麥總助攻，美斯喺左路妙射得手，掀開狂勝序幕。
上半場呢個三叉戟極速入局，32分鐘，輪到麥總喺左路施射建功，3分鐘後，美斯助攻尼馬，射成3:0，海法之後靠守將錫克破蛋，不過美斯喺完半場前禁區外靚波破網，將紀錄改寫成4:1。
換邊後PSG未有放鬆，雖然海法馬卡比一度追至2:4，但其後麥總回敬一球，加上烏龍波及卡路士蘇拿士哥，湊成7:2大捷，PSG於H組累積11分，鎖定出線16強，分組賽最後一輪將對祖雲達斯，要睇埋另一邊賓菲加咩賽果，先確定能否取得首名。
點都好，35歲零123日大嘅美斯，喺今仗刷新多項紀錄。
1, 創造4個入球，成為歐聯史上造出「雙雙」數據中，年紀最大嘅球員。
2, 美斯喺歐聯分組賽累積入80球，史上最多，比C朗多7球。
3, 由04/05年，美斯首戰歐聯開始，一共於禁區外射入23球，超越C朗，成為歐聯同期嘅「遠射王」。
4, 美斯今季入11球、12次助攻，成為今季最快達到「雙雙」嘅球員。
同組另一場賽事，意甲老牌勁旅祖雲達斯繼續沉淪，作客以3:4不敵賓菲加，自2013/14球季後，再次於分組賽階段出局。祖記今季喺意甲只係排第8，依家歐聯又出埋局，阿里基到截稿前仍未被炒，都算係一個奇蹟嚟。
