拿玻里今季成績好，但唔係好多人對佢哋好了解，感覺既熟悉又陌生。查實現時拿玻里陣中有唔少高質球員，包括身穿77號球衣嘅翼鋒基華拉斯基利亞。
歐聯8強AC米蘭對拿玻里，基於拿玻里前鋒奧斯文受傷缺陣，故此司職翼鋒嘅基華拉斯基利亞將會肩負更大責任。現年22歲嘅基華拉斯基利亞，可謂一個全能進攻球員，無論翼鋒、進攻中場以及正前鋒都做過，既有遠射腳頭又有細膩腳法，難怪成為拿玻里球迷新寵兒。
今季歐聯賽事，基華拉斯基利亞已有4次助攻，與幾位大名球員比如聖耳日門美斯、曼城迪布尼並列次位。另外，歐聯入球亦有4個。基華拉斯基利亞表現好，自然有唔少球隊想收購佢，其中一間就係今場歐聯對手AC米蘭。
紅黑兵團為求得到基華拉斯基利亞，所以特登搵前AC米蘭後衛兼現任提比利斯市長卡拿迪斯做說客。事關兩人同樣來自格魯格亞首都提比利斯，大家同聲同氣點都易話為啲。不過，基華拉斯基利亞係咪轉會，點都要問過拿玻里先。
基華拉斯基利亞(Khvicha Kvaratskhelia)個名好翹口，所以佢就喺youtube shorts以英文教大家點讀，若嫌麻煩的話，就咁叫佢「Kara」都無問題。
