【歐聯】8強抽籤 地獄下線!4大熱門打餐飽;拜仁對阿仙奴 卡尼會被宿敵收檔?

歐聯8強抽籤出籠,4場都係強強對碰,抽籤後,足智彩列歐聯4大熱門順序分別係曼城(3倍)、阿仙奴(5.5倍)、拜仁及皇馬(6.5倍),較冷嗰4隊係巴塞及PSG(7倍)、馬體會(11倍)同多蒙特(22倍),抽籤後各支球隊嘅奪冠賠率順序,同抽籤前一樣,都幾罕見。

但有趣嘅係,4大熱門其實唔單止捉對廝殺,仲要同樣身處下線,阿仙奴對拜仁慕尼黑、曼城對皇家馬德里;上線則為巴黎聖日耳門對巴塞隆拿、馬體會對多蒙特。

拜仁已幾乎肯定冇德甲冠軍,國內盃賽亦早早出局,卡尼想洗脫黑腳污名,歐聯係唯一機會。効力熱刺,哈利卡尼多次同阿仙奴進行倫敦打吡,估唔到今季轉會拜仁,依然對返呢支宿敵。

如果計往績,拜仁無疑佔優,因為自2000年以來,佢哋5次喺淘汰賽遇上阿仙奴,最後都由拜仁出線。當中2017年16強,拜仁更兩回合計以10:2淘汰阿仙奴,但今時唔同往日,阿仙奴如日中天,相反拜仁則有疑似黑腳卡尼,形勢會唔會改變?

至於曼城、皇馬過去兩屆都喺4強相遇,結果各淘汰對手一次,勝方打入決賽後,最後都成為冠軍,可以話大家都係大家嘅試冠石。3屆連遇,難見高低。

巴黎聖日耳門對巴塞隆拿,除咗睇下季會轉投皇馬嘅麥巴比,預演對未來宿敵之外,兩軍主帥安歷基同沙維,更屬巴塞系同門師兄弟。

馬體會對多蒙特,球星卡士唔及以上6強,但兩軍同樣硬淨實際、拳拳到肉,難分高低,激戰難免。

首回合4月10或11號凌晨舉行,次回合之後一周上演。

歐聯8強形勢 上線 馬德里體育會(西班牙) vs 多蒙特(德國) 巴黎聖日耳門(法國) vs 巴塞隆拿(西班牙) 下線 阿仙奴(英格蘭) vs 拜仁慕尼黑(德國) 皇家馬德里(西班牙) vs 曼城(英格蘭)