始終贏唔到波，即使表現唔算差，車路士喺歐聯16強首回合，作客仍然以0:1負多蒙特，買齊人後踢咗3場波，2和1負仲未開齋。
今場又又又係黑仔嘅，車路士表現，正如領隊樸達賽後所講，又係正在進步之中，作客德國做到反客為主，全場有19次射門。但買咗咁多人，始終欠缺一個「士哥拿」，臨門一腳把握力嚴重不足，祖奧菲歷斯曾射中楣，列斯占士兩次有威脅攻門亦被救出。
狂攻不成，63分鐘反而畀多蒙特一個突擊搞掂，嚴格嚟講，係一人突擊至啱。艾迪耶美藉車仔角球斷䌫，由後場開始狂爆，當時車仔全軍壓上，最後係安素費南迪斯，但佢速度跟唔上，畀艾迪耶美爆過，射成1:0。艾迪耶美由攞到波後狂放，至最後射波入網，途程足足有70碼。
雖然阻止唔到對手入波，但安素費南迪斯全場表現其實唔錯，完場前禁區外妙射睇住有機會入網，但又被多蒙特門將基哥高保神救；之前又有球高列巴尼勁射，喺白界線前被安利簡恩解圍，整定車仔先輸一粒，3月8號返主場再戰多蒙特。
連續咁多場都係齋贏形勢，繼續中楣中柱、被救空門、被神救，係黑仔嘅，但係咪真係齋黑仔咁簡單？把握力極弱、欠缺正中鋒似乎係關鍵原因。
錢又駛咗，一路贏唔到，都唔係辦法，今個周六返英超，主場對包尾大幡修咸頓，仲唔依絲執？修咸頓日前炒咗領隊尼敦鍾斯，由馬殊接手，喺呢個情況下，如果車仔主場又贏唔到，樸達唔係仲有面留低吓嘛！
同晚另一場首回合賽事，布魯日主場0:2負賓菲加，神奇不再。布魯日分組賽頭3戰全勝，創造比利時球會出線奇跡。但之後瘋狂跌watt，連今仗在內，各項賽事已14場未贏過。
