'

【歐聯】5連殺!拜仁恰死巴塞 羅拔仔倒戈失入波良機;利記絕殺阿積士  高普抖大氣

對巴塞之前,有人話拜仁冇球員可以嘜到羅拔利雲杜夫斯基,結果係羅拔仔失去超級射手觸覺,巴塞形勢稍佔優下,作客以0:2落敗,歐聯連續5次不敵拜仁。

巴塞今仗數據佔優,除控球權,射門次數亦領先18:13,當中包括羅拔仔兩次近門失機,柏迪亦錯失兩個黃金機會,反而下半場初段,畀盧卡斯靴南迪斯、利萊辛尼攻破大門,贏形勢輸波,注定畀拜仁恰死。

拜仁喺死亡C組,連贏國米、巴塞,以6分帶頭。國米作客2:0挫柏辛域利亞,同巴塞都係3分,下輪10月5號凌晨,兩隊會碰頭。

利物浦喺A組首仗,作客1:4大敗畀拿玻里,潰不成軍輸得少;加上英超開季成績麻麻,連高普都畀記者問,驚唔驚帥位唔穩陣呀?

表現唔好,傷兵多確實有影響,呢方面今仗有改善,迪亞高祖達、艾簡達拿傷癒做正選,開波即壓住阿積士砌,17分鐘已打開紀錄,祖達橫傳沙拿,近門射成1:0。

形勢大好,但利物浦防線真係唔掂,27分鐘畀阿積士一個突擊又搞掂。又係阿歷山大阿諾特,畀人劏穿右路冇反應,一對中堅VVD、麥迪比亦反應遲緩,任由古達斯射成1:1。

不過利物浦決心好強,被追和後,繼續全力搶攻,下半場出埋達雲紐尼斯、法明奴,盡地一煲,但攻極唔入,錯失幾個入波良機;直到89分鐘,藉角球由麥迪比助攻頂入,險勝2:1。呢3分攞得辛苦,高普賽後抖晒大氣,皆因呢個主場攞唔晒3分,爭出線會好辛苦,好彩終於過關。A組經兩輪賽事,利物浦、阿積士同得3分,拿玻里周四凌晨對格拉斯哥流浪。

D組熱刺完場前出現黑色3分鐘,90、93分鐘先至失波,作客0:2負士砵亭。士砵亭積6分,熱剌、法蘭克福同得3分,法蘭克福作客贏1:0,馬賽則連輸兩場。

B組布魯日異軍突起,作客4:0大勝波圖,6分帶頭;利華古遜主場2:0挫馬體會,兩隊同得3分,波圖0分包尾。