又係夏蘭特！冇計，呢期佢係流量密碼，尋晚歐聯G組，曼城輕鬆大炒哥本哈根5:0，夏蘭特踢咗45分鐘入兩球，完成基本任務後就功成身退，留力下場……歐聯同英超，幾時先能夠適應夏蘭特？
早幾日喺曼市打吡怒炒死敵嘅曼城，今場作出唔少變動，太子科頓、迪布尼休息，不過外星人夏蘭特繼續掛帥，亦成為哥本哈根門將加巴拉嘅惡夢。
7分鐘，夏蘭特第一次掂波，就接應簡些路傳送，第一時間撞射入網。32分鐘，夏蘭特又出現喺適當嘅位置，趁加巴拉撲出個波不遠，成功執雞，2:0，39分鐘，對手擺咗個老烏，半場曼城已經領先哥本哈根3:0，哥帥亦叫夏蘭特收工。下半場馬列斯入12碼，艾華利斯錦上添花，湊成5:0大捷。
總計呢45分鐘，夏蘭特只掂咗11次波，4次射門，100％命中，2個入波，如果唔係哥本哈根門將左飛右撲超水準，夏蘭特踢半場已可戴帽。
夏蘭特目前踢咗22場歐聯，已經轟入28球，超越蘇亞雷斯同李華度，淨係計今季，歐聯3戰入5球、英超8場入14球，總計11場波就狂入19球，痴線到得人驚。
唔單止咁，球證先生喺上半場跌咗枝罰球噴霧，夏蘭特專登由禁區跑出嚟幫佢執，物歸原主後，又跑返去禁區協助進攻；完場後，沖好晒涼換晒衫嘅夏蘭特，亦冒雨出番球場恭賀隊友，鼓勵對手及答謝球證，真係唔到你唔服。
隊友基亞利殊賽後爆料：「我見到佢又入兩球，真係忍唔住笑，我聽到哥本哈根門將口噏噏，話夏蘭特根本唔係人類……嗯，我希望佢繼續保持狀態啦！」
