20年！紐卡素球迷等咗足足20年，愛隊終於再獲歐聯勝仗，仲要一係唔威，一威就龍咁威，以4:1炒起法甲豪門巴黎聖日耳門，喺死亡F組暫時帶出！
紐卡素喺歐聯首仗作客悶和AC米蘭，而且全程陷於捱打局面，被唔少人質疑以紐記嘅人腳，係咪未足以征戰歐聯。不過經過今仗大炒PSG，相信一眾質疑者都會收晒聲。
紐卡素今場用阿米朗、哥頓呢對翼鋒，支援正中鋒伊沙克，東拿利、古馬雷斯同朗史達夫中場領軍。而巴黎聖日耳門出盡4大鋒將，麥巴比、干沙路拉莫斯、高路梅安尼同奧斯文尼迪比利都係正選。
開波初段，PSG有個黃金機會，丹比利窩利抽射，可惜僅僅斜出。17分鐘，馬昆奴斯解圍犯錯，伊沙克起腳被當拿隆馬撲出，阿米朗補射搞掂，紐卡素先開紀錄。紐記得勢不饒人，39分鐘，丹般飛將軍式頭槌建功，紐卡素半場以2:0領先PSG。
換邊後紐記未有放緩，50分鐘，朗史達夫高速入楔推射，當拿隆馬撲咗個波入網，3:0，盧卡斯靴南迪斯喺6分鐘後幫PSG破蛋，補時階段，法比安舒哈入世界波補多刀，紐卡素大勝4:1完場。
自2003年擊敗利華古遜後，相隔足足7,525日，紐迷終於再次見證球隊喺歐聯正賽贏波，領隊艾迪賀維話：「今晚真係好奇妙！我當然開心，亦戥球迷同球會開心！PSG係一支好出色嘅球隊，不過我哋都守得好好，我哋嘅士氣依家去到頂峰！」
至於被視為出線大熱嘅PSG，今場係2004年9月作客輸畀車路士0:3以來，喺歐聯分組賽嘅最大敗仗，麥巴比全場0過人，完場後仲第一時間直衝返更衣室，冇同到場打氣嘅球迷致謝。PSG教練安歷基賽後話：「紐卡素好有效率，而我哋就係咁犯錯，所以要付出代價。」
F組另一場波，多蒙特同AC米蘭悶和0:0，目前有4分喺手嘅紐卡素，賽後得以喺死亡之組排榜首，PSG落後1分排次席，A米有2分排第3，多蒙特得1分包尾。
