【歐聯】4日內三重打擊!0:1再負剋星拜仁 阿仙奴8強出局;確定無緣參戰新世冠盃

阿仙奴歐聯夢碎!周四凌晨歐聯8強次回合,阿仙奴作客不敵拜仁0:1,兩回合計輸2:3出局。短短4日內,阿仙奴接連輸咗兩場好重要嘅比賽,隨時令今季四大皆空、努力付諸流水。

4日前,阿仙奴喺主場倒灶,輸畀維拉0:2,失去英超榜首位置,依家歐聯都出埋局,想拎冠軍,只有希望曼城自爆,可能性唔係冇,但真係難咗啲。

阿仙奴今場繼續用433陣式,薩卡、馬天尼利支援正前鋒夏維斯,中場奧迪加特、佐真奴拍迪勤懷斯,一對閘係富安健洋、賓韋治,中堅加比爾同沙列巴。

至於主場出擊嘅拜仁,有辛尼、拉菲爾古里路同卡尼合組三叉戟,中場穆斯亞拿,防中有賴馬同哥列斯卡,後防甘美治、艾歷迪亞、迪列特同馬斯拉奧。

拜仁首回合作客和2:2,今場回師主場被稍稍睇好,畢竟拜仁近年喺歐聯賽場剋死阿仙奴,心理同經驗上亦壓倒對手。上半場,穆斯亞拿同奧迪加特都有遠射構成威脅,不過被拉也同紐亞分別擋出,其餘時間都係膠著居多。

換邊後僅1分鐘,阿仙奴防線響起警號,拜仁防中哥列斯卡接應傳送,頭槌勁頂打中門楣,古里路補射被救出,阿仙奴逃過一劫。不過過到初一過唔到十五,63分鐘,古里路傳中,甘美治頭槌破門,拜仁領先1:0。

阿仙奴能夠做到入禁區、極具威脅嘅攻門真係唔多,完場前奧迪加特施射,紐亞擋到再出底線,但可惜旁證睇唔到,連角球都冇,最終阿仙奴以1球飲恨,8強出局。

由於阿仙奴行人止步,改制後大搞嘅世冠盃歐洲12個名額亦已落實,阿仙奴始終追唔番啲分,由奧地利勁旅薩爾斯堡紅牛搭上尾班車,出戰世冠盃,獲得5000萬歐元嘅保底獎金。

至於拜仁領隊杜曹雖然今季冇貨交,但帶領拜仁殺入4強後創造歷史,成為第一位帶領3支唔同球隊入歐聯4強嘅德國籍領隊。