【歐聯】4強首回合1:0贏聖日耳門 查頓辛祖球王級水準 多蒙特寸坦克:欠佢一個道歉!

周三歐聯4強首回合,多蒙特主場憑富克洛一箭定江山,1:0擊敗巴黎聖日耳門,先拔頭籌。但全場最突出球員,必然係由曼聯外借回歸嘅查頓辛祖,佢全場12次成功過人,成為繼球王美斯後,喺歐聯成功扭過對手最多次嘅球員,真正爭番口氣。

上兩季由多蒙特轉投曼聯,查頓辛祖由身處天堂嘅金童,突然打落地獄,今季重返成名地,真係最明智抉擇。多蒙特賽後仲喺X咁講:「有人欠咗查頓辛祖一個道歉,我哋對佢一向充滿信心。」雖然冇開名,大家都知係寸曼聯領隊坦哈格。

開賽後兩軍都有埋門,但未能產生太大威脅。35分鐘,多蒙特尼高舒洛達碧克後場靚長傳,富克洛第一時間控前,再勁射入網,主隊先開紀錄。完半場前,多蒙特幾乎拉開比數,但沙比薩禁區內勁射被救出。換邊後51分鐘,麥巴比勁射中楣,阿舒拉夫補射中柱,整定聖日耳門先輸首回合。

查頓辛祖季初同曼聯領隊坦哈格反面,外借返多仔,回歸後表現回升,17戰攻入3球,今仗更成最搶鏡球員,全場觸球99次,送出3次關鍵傳球,仲有12次成功過人,過人次數,僅少於2008年歐聯4強16次成功過人嘅美斯,亦創下英格蘭球員歐聯最佳紀錄。

賽後唔少名宿及球評家,都對查頓辛祖讚不絕口,前曼聯中場夏格維斯:「辛祖好出色,佢今場表現,遠勝世界最佳球員麥巴比!狀態更好、更有自信。」另一曼聯名宿里奧費迪南亦話:「佢好似入咗無人之境咁,完全玩殘對手!」

隨住多蒙特今場贏波,德國嘅歐聯系數肯定排第2,所以德甲喺來季改制後嘅歐聯參賽隊數會增加1席,共5個歐聯席位;亦代表住英超只有今季頭4名先有下季歐聯入場券,維拉同熱刺只能活1隊。更有趣嘅係,多蒙特喺今季德甲極大機會以第5名衝線,故今次贏波最大得益者,正正就係多仔自己。